Read saamia Esabbuli 51 Bible Online

Esabbuli 51 - saamia bible

Esabbuli 51

¹Ngwiire esisa, Ewe Nasaae, ohweema hu buheeri bwao butaakama. Ohweema hu sisa syao siingi, nduseho ebyonoono byaange byoosi.

²Njoseho ebyonoono byaange byoosi, mani wuundabye wuumaleho ebyonoono byaange!

³Olwohuba ese omweene manyire obudoondobanu bwaange koti lu bwaaka, haandi ebyonoono byaange byamenya mu moni waange.

⁴Mani ewe mweene, niiwe yi ndonoonera, haandi ndahola ebitasangaasa mu moni wao. Oli owadyeeri ohuheengera omusaango; waheengera omusaango mani kwaahira.

⁵Bona, ese ndeebulirwa mu syonoono, haandi mu syonoono nimwo mu maama yanyoolera amabaanga kaange.

⁶Bona, ewe wekoomba obwadyeeri bube mu mwooyo kw'omuundu; mani sakira, njekese amakesi, kabecheenge mu mwooyo kwaange bweene.

⁷Nduseho esyonoono syaange, ndiinyulule muno, ndabe; njose, mani ndabe ohuhiraho enyaange.

⁸Njichusemo omweehoyo neende esangaalo; leha amakuumba ka wali niwafunaka-funaka kasangaale.

⁹Otehaliirisa ebyonoono byaange, mani osaangulireo elalira omufuto kwaange.

¹⁰Noongemo omwooyo mulai, Ewe Nasaae waange, mani omale wuundeemo mwooyo muyaaha, haandi omuluungifu.

¹¹Otaasukuna eyale ohutula yooli, haandi otaamalaho daawe Mwooyo wao Mwoolerefu.

¹²Ngobosere esangaalo ly'obuwonia bwao, mani wuumberese omwooyo kusangaalire ohuhola by'odaha.

¹³Hu nyemeo nyale ohweekesa abadoondobanu engira chao, mani abahola-mbi banyale ohukobola yooli.

¹⁴Nunule wuunduseho omusaango kw'ohwiitwa, ewe Nasaae omuwonia waange, mani olulimi lwaange lunyale ohweembera aakulu obuwonia bwao.

¹⁵Ewe Omwaami waange, hoonye nomanome, mani omunwa kwaange kunyale ohuhufumia.

¹⁶Olwohuba ewe haba s'osangaaliraanga ebiyaanwa byoong'ene; ese ndahayaanireyo ebiyaanwa bisaambwa, nae ebyo haba sibyahusangaasa daawe.

¹⁷Mani esiyaanwa esifukiirirwa muno neende Nasaae, nisyo mwooyo kwefunaake; neende omwooyo kweeyolobya, Ewe Nasaae waange, haba soochia ohukulekeresa daawe.

¹⁸Ewe holera Siyooni ebilai neende esangaalo lyao elai; yoombaha buyaaha ebida bya Yerusalemu,

¹⁹ao bulaanu ochia ohusangaalira mu biyaanwa biluungifu, mu biyaanwa bisaambe, haandi neende ebiyaanwa bisaambwa byoosi byaakwa ekohe; hu bulaanu esurusi chiba chichia ohuyaanwayo hu alutaari yao.