Read saamia Esabbuli 55 Bible Online

Esabbuli 55 - saamia bible

Esabbuli 55

¹Wulira esaala yaange, Ewe Nasaae; mani ewe omweene otafudatira amaliro kaange daawe!

²Deebaho hu bulamu bwaange, mani wuungobolemo; ohweyendehera hwaange humaliremo amaani. Mbwoyoohe

³ohweema hu huyokera hw'abasuku baange, ohweema hu hufwiinyirira hw'omuundu mubi. Olwohuba bali ohumeedaho ebidinyu, etima lyaabwe likera nibaahayisiraho obusuku.

⁴Omwooyo kwaange kwiichuuleho esibeera, endeenga y'ohufwa yiinjichuuleho.

⁵Obuti neende oluteengo biimbwereereho, haandi obuti bwaambitiriiraho.

⁶Mani ndeecha ndaboola endi, “Eee, mba ndiho embaya koti eguugu! Ndahabburuuhe ndawaao ndaanyala ohuwuluuhaho.

⁷Eee, ndahachiire ndayiikanira edoloondo, ndahachiire ndaamenya mu siparara.

⁸Ndahanguuye muno ohwenyoolera obwiiruhiro ndaatula hu muyaka kw'amaani neende esiifuusye.”

⁹Nyaasa endekeha chaabwe echio, ewe Omwaami waange, doondobania enimi chaabwe; olwohuba ndi ohubona obutemo neende obusoolo byoong'ene mu siko sino.

¹⁰Esideete neende esiro bakeenda nibasyebodoohania nae amasira neende ebidinyu bihaya nibyo ebyeechula mukati wasyo,

¹¹banyaasa ebiindu akatikaati w'esiko; ohufwiinyana neende obwiibi haba sibitulaangaho mu biito byasyo.

¹²Omusuku waange aba niye owuunyeka, ao ndahabeere ninyala ohusyesimiirisaho; nae haba si musuku oli ohuholeraanga alala naange bubi atyo daawe ao ndahanyalire ohumweekisaho.

¹³Nae ohola bino niye ewe, yihwaakana nae, owasyaange mweene, haandi omwiicha yi manyire mweene.

¹⁴Hwobbaanga nae embaha chinyunyuula; haandi hwabukanaanga nae mu nyuumba ya Nasaae.

¹⁵Mani leha ohufwa hubakweeho; leha beehirire emakoombe nibasisiiri abalamu; leha bachie mu ng'ani chaabwe nibali mu luteengo.

¹⁶Nae ese naanga Nasaae yahoonye; mani Omwaami waange achia ohuumonia.

¹⁷Engoloobe neende echuli, kata neende esideete akati, njia ohutuumbulaanga ohwekanyiirisa hwaange alala neende amaliro kaange, mani achia ohuwulira ekono lyaange.

¹⁸Achia ohununula obulamu bwaange abuwonie ohutula mu biita bino bi ndi ohulwaanakana, olwohuba abaandetekeheere baangi nibo.

¹⁹Nasaae waange achia ohuumbulira mani abakwiise esyeejo, oyo owatuka ohutula hale-na-haandi; olwohuba abo bahalaki b'amalako koosi, haandi haba sibatichaangaho Nasaae daawe.

²⁰Owasyaange wuno, yaseetaanga beecha bae, yahalaka endagaano yae.

²¹Enomanoma yae yalichiingi engwalaafu koti amafuta k'eng'oombe, nae hane ebiita bihaya nibyo ebyali nibyeechula mu mwooyo kwae; emboosi chae chalichiingi enyaangu ohuhiraho neende amafuta, nae hane chalichiingi sa engaanga chisoboolwe mu bilaalo hale.

²²Disaanga ebidinyu byao Omwaami, achia ohuhoonya; haba saachia ohukanya omuluungifu ohudengaanisibwa daawe.

²³Nae ewe, ewe Nasaae waange, ochia ohubahubba aasi mu buko buhiramo ohwooloberera; abaandu beedisi b'amabaanga neende ababachirisi haba sibachia hunyala ohuyiindira ohumalaho kata esituundu syoong'ene esy'endaalo chaabwe. Nae ese njia ohuhweesikaanga.