Read saamia Esabbuli 56 Bible Online

Esabbuli 56 - saamia bible

Esabbuli 56

¹Ngwiire esisa, ewe Nasaae waange, olwohuba abasuku baange bali ohuusenakira; esiha syoosi abaandu babi bali ohufwiinyiriraanga;

²oludaalo lwoosi, abasuku baange bali ohuusenakira, olwohuba abaandu baangi muno bali ohunwaania nibehuduumbasa.

³Nae obuti nibundiira, niiwe yi ndesika, ewe Omwaami.

⁴Nasaae waange, Nasaae yi fumia emboosi yae, mu Nasaae oyo nimwo mu ndeesika nimbulamo obuti bwoosi. Mani omuundu sa, anyala ohuuholaho siina syeene?

⁵Esiha syoosi, bano bakiiya ohunyaasa bi mba nitekeehe; buli siha batekeha sa ohuholaho esibi.

⁶Beeboya silala, baandeeboondera, beehaliirisa buli siindu si hola, nibadaha ohuholaho obubi. Koti lu bali ohukiiyaanga obulamu bwaange,

⁷mani wesi batuunge koti obutemo bwaabwe bufwaana; neende obwaalaba bwao bwoosi, bahuubbe aasi, ewe Nasaae waange!

⁸Ewe omanyire bulai bweene amahabi kabasaandiisye; omanyire obuungi bw'amasika kaange! Haba siwakaandiika mu sitabo syao?

⁹Mani abasuku baange boosi bachia ohukoboswayo enyuma hu ludaalo lweene lu ndahalirire Nasaae. Sino si manyire, mbwe Nasaae ali hu lwaande lwaange.

¹⁰Mu Nasaae waange, yi fumiaanga emboosi yae, mu Omwaami mweene oyo, yi fumiaanga emboosi yae,

¹¹mu Nasaae oyo nimwo mu ndeesika mani ndabulamo obuti bwoosi. Omuundu sa, anyala ohuuholaho siina syeene?

¹²Mani oyo niye yihoyere ohwooseresera obweyamo bwaange, ewe Nasaae waange; Ewe niiwe yi njia ohuwaanira ebiyaanwa by'ohweebasa.

¹³Olwohuba ewe niiwe onyalire ohununula obulamu bwaange ohuhaya ohufwa, eee, kata neende amakulu kaange ndaahaya ohukwa, hu nyale ohukeenderaanga mu moni wa Nasaae ebiha byoosi mu bulafu bw'obulamu.