Read saamia Esabbuli 59 Bible Online

Esabbuli 59 - saamia bible

Esabbuli 59

¹Ewe Nasaae waange, monie abasuku baange ngaye wuunduse eyiri abo abadaha ohuseeta,

²monie wuunduse eyiri abahola-mbi, mani wuumonie abatemo, abo abekoomba ohwiidisa amabaanga.

³Olwohuba bona, bateesa ohumalao obulamu bwaange; abaandu baalaba beeboyere silala ohuseeta. Ataaliho esidoondobanu syoosi, oba esyonoono syoosi si holere, ewe Omwaami,

⁴ataali siindoondobanu syoosi daawe, nae bayuyuuhana ohundeetekehera. Ewe siingira, mani wiichie wuhoonye, mani bona!

⁵Ewe, Omwaami waange, haandi Nasaae w'amaye, niiwe Nasaae wa Yisiraeli. Simuha mani osaandye ebyaalo byoosi; otalehaho kata mulala hu beebachirisa nibatekeha ohuholaanga ebibi yawona.

⁶Buli ngoloobe bakobola engo waabwe, nibasamaachuha koti embwa nibayeyeema mu siko.

⁷Mbabo baanyeka haandi batiisa-tiisa, olulimi lubali koti engaanga muhanwa mwaabwe olwohuba babaasa bati, “Wiina mweene ochia ohutuwulira?”

⁸Nae ewe, ewe Omwaami, obacheheerera; ewe niiwe otechaanga oluteengo mu byaalo byoosi.

⁹Eee, amaani kaange, njia ohweemba nihufumia; olwohuba ewe, ewe Nasaae, niiwe olukoba lwaange.

¹⁰Nasaae waange, mu buheeri bwao butaakama ochia ohubukaanana naange; Nasaae waange, niye ochia ohukera mbone abasuku baange nibayiingirwa.

¹¹Otabeeta daawe, olwohuba abaandu baange baba bachia ohwiibirira; ewe bi waaholera neende obunyala bwao mani basakuule sa, mani obeese aasi, Ewe Omwaami, niiwe engabo yeefwe!

¹²Hulw'esyonoono sy'eminwa kyaabwe neende emboosi ch'eminwa kyaabwe, leha abeene beetekere mu hwehuduumbasa hwaabwe. Olwohuba babwaaba haandi babacha

¹³basihirise neende etima, basihirise mu tima lyao, basihirise obamalireo elalira, hu baandu beemeo bamanye bati, hane Nasaae niye otuka Yakobbo ohwoolera elalira yi syaalo syaakama.

¹⁴Buli ngoloobe bakobolaanga engo, nibasamaachuha koti embwa haandi nibayeyeema mu siko.

¹⁵Bang'aabana nibakoonya ebyohulya, mani nibabuluula nibatanyala ohulya beekuta.

¹⁶Nae ese njia ohweyeembera obuhunuufu bwao; njia ohweemba nindehuuma obuheeri bwao butaakama echuli-chuli. Olwohuba ewe obeere yi ndi koti olukoba, haandi obwiiruhiro mu ndaalo chaange ch'ebidinyu.

¹⁷Eee, amaani kaange, ese njia ohuhweembera nihufumia, olwohuba ewe, ewe Nasaae, niiwe olukoba lwaange, ewe Nasaae, owuunjekesaanga obuheeri bwao butaakama.