Read saamia Esabbuli 62 Bible Online

Esabbuli 62 - saamia bible

Esabbuli 62

¹Nasaae yeeng'ene niye yi mwooyo kwaange kuliindirira nindeesimiriise; oyo niye otulaangamo obuwonia bwaange.

²Oyo yeeng'ene niye olwaanda lwaange, haandi obuwonia bwaange, niye olukoba lwaange; ese haba siinjia hudengaanisibwa daawe.

³Eng'we mweesi mwahaakame yeena ohuseeta omuundu nimudaha ohumwiita omuundu oli koti esida syeyenyeehe, haandi koti olukaka lukwa?

⁴Esichiiririrwa siri silala syoong'ene ohumukwiisa aasi atule hu buhunuufu bwae. Basaangaalira ebitaali ebyadyeeri. Baberesa ehabi neende eminwa kyaabwe, nae mukati mu myooyo kyaabwe babwaaba.

⁵Nasaae yeeng'ene niye yi mwooyo kwaange kuliindirira nindeesimiiriise, olwohuba esuubi lyaange litula mu Nasaae.

⁶Oyo yeeng'ene niye olwaanda lwaange, haandi obuwonia bwaange, olukoba lwaange; mani ese haba siinjia hudengaanisibwa daawe.

⁷Hu Nasaae nihwo hu bununuli bwaange, neende oluyaali lwaange byeemere; olwaanda lwaange luhunuufu, haandi obwiiruhiro bwaange, niye Nasaae.

⁸Mumwesikeenge ebiha byoosi, eng'we abaandu; techeenge buli siri mu myooyo kyeeng'we mu moni wae; Nasaae niye obwiiruhiro bweefwe.

⁹Mubwadyeeri, abaandu b'oluyaali lwaasi bali koti omuuya kwoong'ene, nae abaandu b'oluyaali lw'aakulu nabo bali koti omuuya; noobata hu latiri bawanyuha aakulu; boosi baangu ohuhiraho omuuya kwoong'ene.

¹⁰Otesikaanga mu fuma, otatechaanga esuubi litahoonya mu bunyaka; emyaandu nikiingiya, otachimaliraangaho omwooyo kwao.

¹¹Oluundi Nasaae yaboolaho; haandi habiri ese ndawuliraho endi: Mbwe obunyala bwoosi bwa Nasaae;

¹²haandi endi, eyiri ewe, ewe Omwaami, niyo eyiri obuheeri butakaluuhana. Olwohuba ewe niiwe okabulaanga omuundu ohweema hu mirimo kyae.