Read saamia Esabbuli 63 Bible Online

Esabbuli 63 - saamia bible

Esabbuli 63

¹Ewe Nasaae, niiwe Nasaae waange, hukoonya muno. Omwooyo kwaange kuhufwiira obuluwo; omubiri kwaange kuhwekoomba, koti lu loba lyoomu haandi elyajoong'a hale, lidaha amaachi.

²Mani syeesi sakira ndekoomba ohuhubona mu bwiihalo bwao bwoolerefu, nimbona koti lu oli ow'obunyala haandi ow'oluyaali.

³Olwohuba obuheeri bwao butaakama buhira obulamu, mani njia ohuhufumia.

⁴Ese njia ohuhweebasaanga endaalo choosi ech'obulamu bwaange bwoosi; njia mani ohusiingisaanga amahono kaange aakulu mani naangeenge eliita lyao.

⁵Omwooyo kwaange kusaangaalire koti omuundu oliire ebyohulya bilai, haandi omunwa kwaange kuhufumia neende enyembo ch'esangaalo,

⁶nihubaasaho ni ndi mu buliri, nihuhubbakachania ebibaaso esiro syoosi;

⁷mbona endi niiwe obechaanga obuhoonyi bwaange, haandi ni ndi mu siiniha sy'embaya chao, nyemba nindeehoya.

⁸Omwooyo kwaange kwoomera hu ewe; omuhono kwao muluungi nikwo okuniindaanga.

⁹Nae abo abakiiya ohusihirisa obulamu bwaange nibo abachia ohwiihirira emakoombe;

¹⁰bachia ohwiitwa neende olugaanga, bachia ohweehola ebyohulya by'ebinamiindi.

¹¹Nae omutuki achia ohusangaalira mu Nasaae; haandi abo boosi abeechubira mu Nasaae bachia ohusiimibwa; eminwa ky'ababacha kichia ohubwiihwao.