Read saamia Esabbuli 69 Bible Online

Esabbuli 69 - saamia bible

Esabbuli 69

¹Ewe Nasaae, monie! Olwohuba amaachi mbano kamalire ohuunjola mu kosi.

²Ndi ohwiibira mu ludodo lweene, eyitaaliho neende yi nyala ohuseena ohukulu daawe. Njolere mu lusiba lweene, mani ehulukusi yoong'ene niyo eyiri ohuuhubbaangaho.

³Ohulira huunjoong'iise; amamiro kaange kamalire ohuheenguha. Emoni chaange chichia nichiwofula niniindiriire Nasaae waange.

⁴Abo abasyuula ataali esifune, baangi muno ohuhira efwiiri lyohu mutwe kwaange; abekoomba ohusihirisa b'amaani maangi muno, abo abaseeta neende obubacha buhaya. Bulaanu ngoboseo esiindu si teeba?

⁵Ewe Nasaae, ewe niiwe omanyiire elalira obubi bwaange; obudoondobanu bwaange haba sibwahwekisa daawe.

⁶Otaleha abo abahweesika esoni chabadiira daawe hulwaange, ewe Omwaami Nasaae w'Obunyala; otakanya abo boosi abahukoonya boole ohudiirwa esoni hulwaange, ewe Nasaae wa Yisiraeli.

⁷Niiwe okera mani baasinyiha, niiwe okera esoni nichindiira.

⁸Ndeeholere walukeenda eyiri abaana beefwe beene, omuteende mweene, eyiri abaana ba maama beene.

⁹Olwohuba ohuchuunirwa enyuumba yao hundeeteere ebidinyu, neende amanyeko kabahunyekaanga koosi kambwereereho.

¹⁰Nindateemaho ohweloongoyasa nisiiba enjala, elyo lyeecha lyaaba enyeko lyaange.

¹¹Niteemaho ohwefwaala ebigunia koti engubo chaange nindeyolobya, nilwo lu ndeecha ndeeholera elalira esy'omusiro yi bali.

¹²Ese leero ndeehola embaha ch'abo ababuuchira mu siruwa, haandi abameesi bosi baandusamo enyembo chibeemba nibameerere.

¹³Nae ese, husaba ewe, Omwaami. Mani mu siha syeene esihoyera, ewe Nasaae, haandi mu bubitiirifu bw'obuheeri bwao obwo, wulira esaala yaange. Mu buhoonyi bwao bweesikwa

¹⁴yiichia wuununule wuungayire ohwiibira mu lusiba luno; leha mone mani ndule hu basuku baange neende ohutula mu lusiba luno.

¹⁵Otakanya ehulukusi yaahubbaangaho yityo daawe, oba olusiba lwaamira, oba obuko bwaanyala bwaamira daawe.

¹⁶Wulira ohusaba hwaange, ewe Omwaami, olwohuba obuheeri bwao butaakama bulai nibwo; ohweema hu sisa syao sibitiirifu, kaluuhana wuumbone.

¹⁷Otakisa obweeni bwao ohutula eyiri omuhalaabani wao; olwohuba ese ndi mu sibeera, mani yanguyaho ohungobolamo.

¹⁸Suda yi ndi, wuununule, mboolole, ndule hu basuku baange bano!

¹⁹Ewe omanyire muno amanyeko kaange koti lu kaaka, neende esoni chaange, neende ohumalwamo oluyaali hwaange; haandi abasuku baange boosi bamanyihaane yooli.

²⁰Amanyeko kamalire ohuumalamo omwooyo, sakira ndi mu kusinye. Ndakoonya ohungwiira esisa, nae haba sindabonaho oyo yeesi onyala ohuholera atyo; neende onandeemberese, nae haba sindanyoolaho onyala ohuhola atyo daawe.

²¹Baamberesa obutwa mu siha sy'ebyohulya, nae ohungwiisa obuluwo, nabo baamberesa amalwa kahaliihe ohung'wa.

²²Leha mani emeesa y'ebyohulya yaabwe yeene eyiri mu moni waabwe yeehole olutuula; leha ebidyaalo by'ebiyaanwa byaabwe byeehole omuteego.

²³Leha emoni chaabwe chiwofule, mani hu bahaye ohubona daawe; haandi kera engubo chaabwe chemeede ohuteengereha nibatiire endaalo choosi.

²⁴Babbwomooleho etima lyao, haandi leha etima lyao lyaaduha-bwaaduha libanyoole.

²⁵Ekaambi yaabwe yihoya yaadoong'a ekuunda, leha abuleo omuundu yeesi onyala yaachia yaamenya mu mayeema kaabwe ako.

²⁶Olwohuba abo haandi basihirisa oyo yi ewe omweene wamala osaandya, haandi oyo yi ewe omweene wamala ohunyaala, haandi bosi bemeeda ohumusaandya muno.

²⁷Mani ewe bameede ohubasaandya muno; mani ohaye ohubakwiira esisa.

²⁸Leha abo basaangulwe mu sitabo sy'abalamu; leha abo bahaye ohwandiikwa alala neende abaluungifu.

²⁹Nae ese mbano malire ohunyaalwa haandi ndi mubuchuuni; leha obuwonia bwao, ewe Nasaae, buniinie mbe aakulu muno!

³⁰Ese njia ohufumiaanga eliita lya Nasaae mu lweembo; ese njia ohumufumia nimweebasa.

³¹Sino sichia ohusangaasa Omwaami oyo ohuhiraho eng'oombe ndaawu oba eng'oombe surusi eyiriho enjika neende ebirekeyi.

³²Leha oyo owafwiinyirirwa anyale ohusibona, mani asangaale; eng'we abakoonya Nasaae, lehe emyooyo kyeeng'we kikaluhemo.

³³Olwohuba Omwaami oyo awuliraanga ab'obudahano, haandi haba s'alekeeresaangaho abaandu bae ababa nibali mu buboye.

³⁴Leha ekulu neende esyaalo bimufumie, enyaanja choosi, alala neende ebyo byoosi ebichikeenderamo.

³⁵Olwohuba Nasaae achia ohuwonia Siyooni haandi yoombahe buyaaha ebiko bya Yuda; mani abahalaabani bae banyale ohuchia babimenyemo, mani babiyire;

³⁶abaana b'abahalaabani bae bachia ohusisihira, mani abo abaheera Omwaami bachie basimenyemo.