Read saamia Esabbuli 78 Bible Online

Esabbuli 78 - saamia bible

Esabbuli 78

¹Muteke amatwi, eng'we abaandu baange, muwulire enjekesa yaange; mutekeerese bi mboola!

²Njia ohulomalomera mu ngaado. Njia ohutuumbula enomanoma ya hale muno,

³ebiindu bi hwawulira haandi bi hwamanya hale, bi baseefwe batuboola.

⁴Efwe haba sihuchia hubikisa abaana baabwe daawe, nae huchia ohubiboolera oluse lwiicha ebiholwa by'oluyaali by'Omwaami, neende obunyala bwae, alala neende ebiwuukisa bi yahola.

⁵Yaberesa abeechuhulu ba Yakobbo ebilagiro. Yataao amalako mu Yisiraeli. Nihwo ohulagira bakuuka yeefwe beekeseenga abaana baabwe.

⁶Oluse lwoosi oluloondaho lunyale ohukamanya, haandi bosi bakeekese abaana baabwe babeebula; banyale ohusiingiraanga mani baboolera abaana baabwe.

⁷Mani hu bosi banyale ohweesikaanga Nasaae, mani hu bahaye ohwiibirira emirimo kya Nasaae, nae baloondeenge amalako k'Omwaami.

⁸Bahayeenge ohuba koti bakuuka yaabwe, aboomerana emyooyo mani nibajeema. Abo abatoomiirira mu hweesika Nasaae daawe, haandi abataali neende obweesikwa eyiri Nasaae.

⁹Abefuraimu, abali neende obuyiingo, baheengao ohukaluuhana bakobolayo hu ludaalo lw'ebiita.

¹⁰Bahaya ohuliinda endagaano ya Nasaae, nae bajeemera amalako kae.

¹¹Beebirira ebiindu bi yali niyahola, neende eby'amayia bi yali n'abeekese.

¹²Mu moni wa bakuuka yaabwe, nimwo mu yaholera ebiwuukisa, mu syaalo sy'e Misiri, mu mikuunda kya Soani.

¹³Yakabulamo enyaanja, mani nibabitamo akati. Yeemesa amaachi mani kaaba koti egenya.

¹⁴Mu sideete yabeemereraanga neende esireesi, nae esiro syoosi yabeemiriraanga neende obulafu bw'omuliro kwaaduha.

¹⁵Yaataniamo enyaanda mu siparara, mani yaababeresa amaachi k'ohung'wa ohutula ebusiba.

¹⁶Yaholaanga emyaalo nikihulukusa ohutula mu lwaanda, mani amaachi nikahulukusa koti emyaalo.

¹⁷Nae nibemeeda ohwonoona, nibajeemera oyo Oli Aakulu Muno mu siparara.

¹⁸Bateema Nasaae mu myooyo kyaabwe nibamusaba ohubaberesa ebyohulya bi bali nibekoomba ohulya.

¹⁹Balomaloma hu Nasaae nibaboola bati, “Mani Nasaae anyala ohutukabula ebyohulya mu siparara muno?

²⁰Kata katyo, yahuya olwaanda mani nilusoohamo amaachi. Amaachi kahulukusa emihula ky'amaani. Haandi anyala ohutukabula emigaati kyosi, oba yaleetera abaandu bae enyama?”

²¹Mani sakira, Omwaami niyawulira ebyo, etima lyamudiira; mani n'ahubula omuliro hu beechuhulu ba Yakobbo, etima lyae nilinioohera hu Yisiraeli.

²²Olwohuba haba sibali nibafukiirira mu Nasaae daawe, haandi sibeesika bati niye obawoonia.

²³Nae kata katyo, yalagira lyomu bbanga, mani niyeekulao emilyaango ky'ekulu;

²⁴n'abakwiisira mana balye, haandi yababeresa emere ohutula muukulu.

²⁵Abaandu baalya hu byohulya by'abamalaika; bi yababeresa mani nibeekuta muno.

²⁶Yaleeta omuyaka kwa buyaanja okutulira ebukwe, mani nikuwuucha muukulu, mani amaani kakwo nikaleeta omuyaka kwa buyaanja ohutula niyehoonyera obunyala bwae, yeecha yaatusayo buyaanja ohutulira emwaalo.

²⁷Yababeresa enyama eyahuhumuha koti olufu, niko amayoni k'embaya akaba amaangi koti omusenye kwohu nyaanja.

²⁸Yakera amayoni ako kwakwichaanga akatikaati w'ekaambi yaabwe, ohwebodoohania eyeema chaabwe choosi.

²⁹Mani abaandu nibalya, mani nibeekutira elalira, olwohuba yababeresa esyo si bali nibekoomba.

³⁰Nae bali nibasiilya, haandi nibasisiiri neende amaofu.

³¹Nasaae mani n'abanyoolerera, niyeetamo abo abali nibahiramo amaani boosi. Yisiraeli n'afwiirwa abaraaga balai muno.

³²Kata bino byoosi babibona, bemeeda ohwonoona; kata nibabona ebiwuukisa byae, bahaya ohumufukiirira.

³³Mani endaalo chaabwe chahamyuuhao koti omuuya, haandi obulamu bwaabwe nibusihiriswa bwaangu mu hutya hw'amasira.

³⁴Buli lu yeetangamo abaandu, abalamu bawonereo beyolobyaanga, mani nibakobola aambi nae neende omwooyo mulala.

³⁵Beechulisa bati Nasaae niye owali n'abaliinda, Nasaae w'Aakulu Muno niye owali omununuli waabwe.

³⁶Mu mboosi, bamukachuliraangaho; nae bwali obubacha buhaya.

³⁷Emyooyo kyaabwe haba sikyali neende obweesikwa daawe; haandi endagaano yae haba sibayiliindaanga daawe.

³⁸Nae kata katyo, Nasaae nae olwohuba w'esisa niye, yabaleheraangamo ebyonoono bwaabwe, mani n'ahaya ohubasihirisa. Amahabi maangi muno, yatuka etima lyae, mani n'ahaya ohusiingisa obwaalaba bwae.

³⁹Yeechulisa ati, abaandu b'ohufwa sa, bali koti omuyaka kubita-bubita, okutakobola enyuma haandi daawe.

⁴⁰Bamujeemera amahabi maangi nibali mu sichiimi mani baamunyoolesa nibali mu siparara!

⁴¹Bamuteema amahabi-na-mahabi, mani nibanyoolesa Omwoolerefu wa Yisiraeli.

⁴²Beebirira obunyala bwae, kata neende oludaalo lu yabanunuliraho ohutula mu basuku baabwe;

⁴³koti lu yahola ebiwuukisa byae mu Misiri, neende eby'amayia byae mu mikuunda kya Soani.

⁴⁴Yakaluuhania emyaalo kyaabwe kyaaba amabaanga. Abamisiri nibahaywa amaachi kabanaang'we.

⁴⁵Yabasiindihira ebidiiyiha by'esiiye, echabaluma muno, neende eneenga echasihirisa esyaalo syaabwe.

⁴⁶Ehuungu chalya ebirime byaabwe, haandi esike nichisihirisa emikuunda kyaabwe.

⁴⁷Yasihirisa emisabbiibbu kyaabwe neende amakina k'efula, haandi neende emiseituuni kyaabwe neende omunyiti.

⁴⁸Eng'oombe chaabwe yachiita neende amakina k'efula, haandi ebyaayo byaabwe yabiita neende ehubba.

⁴⁹Yakera beyendeherera muno, n'ababwomoolaho etima lyae neende egiili lyae lyaalaba, bi yabatumira koti bawamwaanda ohubasihirisa.

⁵⁰Haba siyatuka etima lyae; kata ohuleheramo obulamu bwaabwe daawe, nae yabeeta neende oluumbe lubi.

⁵¹Yeeta abaana baamberi boosi mu Misiri, abahiramo amaani mu daala lya Haamu.[2]

⁵²Ao mani niyeemerera abaandu bae koti amakoondi, haandi n'abeemereramo koti ebyaayo byae ababise mu sichiimi.

⁵³Yabeemerera bulai, baahaya ohuba neende obuti. Nae enyaanja niyimira abasuku baabwe.

⁵⁴Mani abaandu bae n'aboosa mu syaalo syae syoolerefu, hu lugulu lu muhono kwae muluungi kwayiingira.

⁵⁵Abaandu bae niboola, yeerusa mu syaalo esyo abaandu bali nibamenyamo, yabakabulamo esyaalo syaabwe, mani yaasiberesa enono cha Yisiraeli, enyuumba chaabwe yachiberesa abaandu bae.

⁵⁶Nae nibateema haandi nibajeemera Nasaae w'Aakulu Muno, haandi nibahaya ohudiira ebilagiro byae.

⁵⁷Nae nibafudata haandi nibahola obubi koti lu bakuuka yaabwe bahola; nibahaya ohweesikwa koti oluyiingo lweekodere.

⁵⁸Bamunyoolesa olwohuba abuundu waabwe wohwiinamiramo ataali awoolerefu; nibamudiisa etima liingi hulw'ebiloongaloongwe byaabwe.

⁵⁹Nasaae niyabona ebyo, yanyoolera muno, mani niyebwaabira elalira abaandu ba Yisiraeli.

⁶⁰Sakira yatula mu yeema lyae elyali mu Silo, eyeema li yamenyaangamo naali alala nabo.

⁶¹Yafukiirira abasuku beefwe ohuwaamba Esanduuku ly'Endagaano, esilolero syeekesa obunyala bwae neende oluyaali lwae.

⁶²Yanyoolerera abaandu bae beene, mani n'abaleha beetwe neende olugaanga.

⁶³Omuliro kweeta abaraaga baabwe, mani abahaana baabwe nibahaywa abanaabadeehye.

⁶⁴Abalaamisi baabwe beetwa neende olugaanga, mani abahasi baabwe balehwa nibatafukiirirwa ohubalira daawe.

⁶⁵Mani Omwaami n'aba koti osimuha ohutula mu ndoolo, koti omusaacha w'amaani ohuumula n'ameerere amalwa.

⁶⁶Mani niyeerusa abasuku bae, nibakobola enyuma; n'abadiisa esoni chitaakama chitawaao daawe.

⁶⁷Yebwaaba abeechuhulu ba Yosefu, n'ahaya ohudoola enono ya Efuraimu.

⁶⁸Nae yadoola enono ya Yuda, Olugulu lwa Siyooni, nilwo lu yadaha.

⁶⁹Yoombahaho Enyuumba Njoolerefu, yayomiisa yaaba koti esyaalo syeene, ohuyiindira endaalo choosi pe.

⁷⁰Yadoola omuhalaabani wae Daudi, yi yatusa mu lwaayiro y'amakoondi;

⁷¹niyaaya amakoondi madwaasi ohuba omwaayi w'abeechuhulu ba Yakobbo, Abaisiraeli abaandu bae.

⁷²Yabaliinda neende omwooyo muluungifu, haandi yabatuka neende amakesi.