Read saamia Esabbuli 85 Bible Online

Esabbuli 85 - saamia bible

Esabbuli 85

¹Omwaami, wadaha muno esyaalo syao; wakobosao ehabi cha Yakobbo.

²Ewe waleheramo ebyonoono by'abaandu bao; haandi n'obaleheramo ebyonoono byaabwe byoosi.

³Waakama ohubanyoolerera; waleha etima lyao lyalaba.

⁴Tukobose buyaaha haandi, Ewe Nasaae w'obuwonia bweefwe, mani waakame ohutunyoolerera.

⁵Ewe mani ochia ohutunyoolerera endaalo choosi? Etima lyao haba silyahaakame daawe?

⁶Kobolamo ohutumeedamo amaani, efwe abaandu bao hunyale ohuhweehoyeramo?

⁷Ewe Omwaami, tweekese obuheeri bwao, mani otuwonie.

⁸Leha mbulire bi Nasaae Omwaami achia ohuboola, olwohuba yasuubisa omuleembe eyiri abaandu bae b'adaha, eyiri aboolerefu bae, abo abakobola yaali neende emyooyo kyaabwe.

⁹Mubwadyeeri bweene, yetekeehe ohuwonia abo abamutya, hu luyaali lunyale ohuba mu syaalo syeefwe.

¹⁰Obuheeri bwae neende esisa syae bichia ohubukaanana; obuluungifu neende omuleembe bichia ohukwiichana mu birifu.

¹¹Obwadyeeri buchia ohumera nibutula mu loba, haandi obuluungifu buchia ohulengeesera nibuli muukulu.

¹²Eee, Omwaami achia ohukaba ebilai byoong'ene, mani esyaalo syeefwe sichia ohuba ekesa liingi.

¹³Obuluungifu buchia ohumweemereramo, mani bimutekehere engira.