Read saamia Esabbuli 86 Bible Online

Esabbuli 86 - saamia bible

Esabbuli 86

¹Ewe Omwaami, tekeeresa mani wuungobolemo, olwohuba ndi omumanani haandi ndi mu ngisa.

²Liinda obulamu bwaange, olwohuba hweesika; monie, olwohuba hweesika. Ewe niiwe Nasaae waange;

³ngwiire esisa, Ewe Omwaami, olwohuba hulirira oludaalo lwoosi.

⁴Ewe Omwaami, sangaasa omwooyo kw'omuhalaabani wao, olwohuba eyiri Ewe Omwaami, niyo yi singisiire omwooyo kwaange.

⁵Ewe Omwaami, oli omulai haandi okwiira esisa, oli ow'obuheeri buungi eyiri abo abahusaba.

⁶Ewe Omwaami, tekeeresa ohusaba hwaange; wulira ohulira hw'ohwekongooya hwaange.

⁷Hu ludaalo lw'ebidinyu byaange, ndahulirira, olwohuba ewe wuungobolaangamo.

⁸Ewe Omwaami, abulao oyo yeesi oli koti ewe mu banasaae boosi, ewe bi wahola, abulao owuundi owali niyabihola daawe.

⁹Ebyaalo byoosi bi wahola byaheeche mani bihwiinamire, haandi bikinie eliita lyao.

¹⁰Olwohuba ewe niiwe omuhunuufu haandi ohola ebiindu biwukisa, ewe weeng'ene niiwe Nasaae.

¹¹Njekese engira yao, Ewe Omwaami, hu nyale ohukeendera mubwadyeeri bwao. Kolola omwooyo kwaange mani hunyale ohwiisa oluyaali muliita lyao.

¹²Ewe Omwaami Nasaae waange, njia ohuhufumiaanga neende omwooyo kwaange kwoosi, haandi njia ohuhufumiaanga endaalo choosi.

¹³Olwohuba ohuheera hwao hutaakama huhunuufu muno yi ndi; waanunula ohutula mu bukubo bw'emakoombe.

¹⁴Ewe Nasaae, abaandu beehuduumbasa mbano baasiingiriireho; omukaanda kw'abatemo nguno kungiiya ohuunjita; abaandu batahudeebaho daawe.

¹⁵Nae Ewe Omwaami, niiwe Nasaae ow'esisa haandi osaasira, ohiinda ohunyoolera, owiichule ohudaha hutaakamo neende obweesikwa.

¹⁶Kaluuhana yi ndi, mani wuungwiire esisa; ese omuhalaabani wao, mberese amaani mani owonie omwaana w'omuhalaabani wao.

¹⁷Mberese ahalolero heekesa koti lu oli omulai, abataandaha esoni chibadiire, olwohuba ewe Omwaami, wuuhoonyere, wuunemiisye omwooyo haandi wuuhoonyere.