Read saamia Esabbuli 88 Bible Online

Esabbuli 88 - saamia bible

Esabbuli 88

¹Ewe Omwaami Nasaae, omuwonia waange, ndira oludaalo lwoosi; haandi esiro njicha mu moni wao.

²Wulira si husaba, wulira amaliro kaange!

³Ndi neende ebidinyu biingi muno, haandi ndi aambi ohwoola emakoombe.

⁴Mbalirwa mwaabo abali aambi ohufwa, mbweeremo amaani koosi.

⁵Ndi koti omuundu oleherwe alala neende abafu koti abo abeetwa, abeeyalisa mu ng'ani, abo bootechulisiraho elalira haandi bootanyala huhoonyaho haandi.

⁶Wuusukune mu liina leeyi muno, mu siirima sy'amaani haandi esyooloberefu.

⁷Etima lyao liisidoyeere muno, haandi efwiinda chao chiihubba nichiinyonyobola.

⁸Ongabuhaanie neende abasyaange; ndeeholere esiindu si tiisa yi bali. Njikaliirwe, haba sinyala hutulayo.

⁹Emoni chaange chihoohere olw'obuchuuni. Buli ludaalo hulirira ewe Omwaami; hubakalirira amahono kaange.

¹⁰Abafu onyala ohubaholera eby'amayia? Banyala baasiingira mani bahufumia?

¹¹Esisa syao si nyala ohukinisibwa mu ng'ani, oba obweesikwa bwao abuundu w'ohusihirira?

¹²Eby'amayia byao binyala byamanyihana mu siirima, oba obuwonia bwaamanyiha obuhoonyi mu syaalo syeebirirwa?

¹³Ewe Omwaami, nae ese hulirira; haandi buli chuli husaba.

¹⁴Ewe Omwaami, lwasiina wuusukuune? Lwasiina wuundebwabire?

¹⁵Saandire muno ohutulira elalira mubuyere bwaange, ndoola aambi ohufwa, otiisire muno mani ebidinyu bimaliremo amaani.

¹⁶Etima lyao limbweereho liri ohuumalao; wunyaalire mani ndi aambi ohusihiririra.

¹⁷Oludaalo lwoosi ebidinyu bindebodoohaanie koti omuhula, binjikaliire hu buli lwaande.

¹⁸Abamanyire neende abeecha baange baanjiruha. Yi ndi esiirima syoong'ene nisyo esiri naange.