Read saamia Esabbuli 90 Bible Online

Esabbuli 90 - saamia bible

Esabbuli 90

¹Ewe Omwaami, ohutula hale-na-haandi niiwe obumenyero bweefwe.

²N'osisiiriri ohuloonga engulu, oba esyaalo nisisiiri ohubaao, niiwe Nasaae endaalo choosi pe.

³Abaandu obakobosayo mu lufu, n'oboola oti, “Mukobole yi mwatula.”

⁴Emyaaka elifu ndala (1,000) hu ewe, kiri koti oludaalo lulala; emyaaka ekyo kiri koti oludaalo lw'ekulo, lubitireo, oba koti esisimuho silala mu siro.

⁵Otuhuluukusa koti omuhula, huhamyuuhao sa koti esilooto. Huli koti obunyaasi obusebuha echuli,

⁶bwaahula bwaangu mani nibumuliha ebimuli, nae engoloobe niyoola buhooha mani nibwooma.

⁷Etima lyao litumalao; n'onyoolera, nihuteengereha-buteengereha.

⁸Ebibi byeefwe obiteere alafu, neende ebyonoono byeefwe byomu ngiso obiteere y'obiboneha.

⁹Obwaalaba bwao bukera n'ohendeesa endaalo cheefwe hu syaalo, obulamu bweefwe bukotao koti ohwiisa omuuya.

¹⁰Emyaaka hwaakama hu amahumi kataanu-na-kabiri, oba amahumi kataanu-na-kadatu eyiri abo abali neende amaani, nae kata katyo, chiba nichichuule ohudidiihana neende ebidinyu; emyaaka ekyo kibitao bwaangu, mani nihukotao.

¹¹Wiina mweene omanyire amaani k'etima lyao koti lu kaaka, neende ohunyoolera hwao koti lu hutiisa?

¹²Tweekese humanye koti obulamu bweefwe buli obwiimbikiti, hu hunyale ohuba ab'amakesi.

¹³Ewe Omwaami, wahanyoolere ohwoola liina? Omwaami, tukwiire esisa, efwe abahalaabani bao!

¹⁴Tweekeseenge obuheeri bwao butaakama buli buhya, Hweehoye mani hweembeenge neende esangaalo mu bulamu bweefwe bwoosi.

¹⁵Tubeerese esangaalo liingi, lituunge emyaaka emiingi ekyo kiwatusaandisiramo, neende emyaaka miingi ki hwaboneramo ebidinyu.

¹⁶Leha, efwe abahalaabani bao hubone eby'amayia byao; leha abeechuhulu beefwe bosi babone amaani k'oluyaali lwao.

¹⁷Ewe Omwaami Nasaae weefwe, leha ehabi chao chibe naafwe, emirimo kyeefwe kyoosi okiberese ehabi.