Read saamia Esabbuli 91 Bible Online

Esabbuli 91 - saamia bible

Esabbuli 91

¹Oyo yeesi owiruhira eyiri oyo oli Aakulu Muno, oyo oliindwa neende ow'Obunyala bwoosi,

²booleraanga Omwaami ati, “Niiwe obwiiruhiro bwaange haandi owungayirira; niiwe Nasaae waange yi ndesika.”

³Olwohuba niye onahuwoniaanga emiteego chaabo abahukiiya neende obulwaae bubi muno.

⁴Nasaae achia ohuhuliindaanga haandi ahubwiihe neende embaya chae. Mweesikwa niye mani achia ohuhuliindaanga.

⁵Otatichaanga ebidinyu byoosi mu siro, oba ebihuseeta esideete

⁶oba amasira koosi akakwaao mu siirima oba ebibi biitirao esideete.

⁷Abaandu elifu ndala (1,000) banyala ohufwa yooli, kata baaba abaandu elifu ehumi (10,000) hu muhono kwao muluungi, nae ewe sibulao esibi syoosi esichia ohuhukwaaho daawe.

⁸Ewe ochia ohutingaala mani webonere koti lu muhola-mbi anyoola omukabo kwae.

⁹Mani Omwaami y'oholere obwiiruhiro bwao, oyo ow'Aakulu Muno niye omuliindi wao ohwaabina.

¹⁰Mani kabulao amasira kachia ohuhwoolaho, haandi hubulao ohusaanda hwoosi ohuchia ohwoola y'oli.

¹¹Nasaae achia ohulagira bamalaika bae bahuliinde eyo yoosi y'ochia ohuchiraanga.

¹²Bachia ohuhudiira mu mahono kaabwe, ohaye ohwegumula ohukulu hu kina.

¹³Ochia ohusenakira edalang'i njalaba, haandi oseene hu njuha ch'obusiba.

¹⁴Nasaae aboola ati, “Ese njia ohuwonia abo abaheera haandi njia ohuliinda abo abafukiirira koti Omwaami.

¹⁵Oyo onanaangeenge, njia ohuhufukiiriraanga, mu bidinyu, njia ohubechaanga nae. Ndahamwaabine haandi mwiisemo oluyaali.

¹⁶Njia ohumuberesa omukabo kw'ohuyiindira emyaaka miingi; haandi njia ohumuwonia.”