Read saamia Engaado 1 Bible Online

Engaado 1 - saamia bible

Engaado 1

¹Chino nicho engaado cha Solomooni, omwaana wa Daudi, omutuki wa Yisiraeli:

²Chino nicho engaado echichia ohuhoonya abaandu bamanye amakesi neende ohukerakirwa, ohumanya emboosi neende amahuluundu machwichwiifu.

³Cheekesa amakesi k'ohuhola ebiindu mu makesi, mu buluungifu, mubwadyeeri, neende ataali ohwehubbira.

⁴Cheekesa amakesi abaandu batali abamanyirifu, chiberesa abaraaga ohumanya neende ohuchwichwiisa.

⁵Omuundu mukesi n'achiwulira, yemeeda ohweeka, haandi chikerakira omuundu owulila,

⁶amanye amahuluundu k'olukaado ko mukati, neende emboosi chilomwalomwa abachweenufu.

⁷Mu hutya Omwaami, nimwo ohumanya muhuchaakira; nae abasiru balekeeresa amakesi neende ohukerakirwa.

⁸Mwaana waange, wuliraanga amakerako ka lataao, haandi otayinganaanga neende bi maakoo ahweekesa;

⁹olwohuba ebyo nibyo ebilyoyesa esaambo chao, koti ekofia hu mutwe, neende olunyolo mu kosi.

¹⁰Mwaana waange, abahola-mbi nibahuseendaseendaanga, otafukiiriraanga.

¹¹Niwiichuhanaanga bahuboolera bati, “Yiicha naafwe, lehe hweekise huliindirire yi huneete, lehe huliindirire abataaliho omusaango, hubaseete ataali esifune,

¹²lehe hubamire koti emakoombe nibasisiiri abalamu haandi abalaamba, koti abo babeesa aasi mu liina:

¹³huchia ohwenyoolera ebiindu by'engaanga y'aakulu muno, huchia ohwiichusa enyuumba cheefwe neende ebiindu bipeeye;

¹⁴yiicha obe alala naafwe, hukabanire alala ebiindu bihunyakire”.

¹⁵Mwaana waange, otateemangaho ohuholera alala nabo, haandi otabesudyaangaho,

¹⁶olwohuba haba sibachia huhiinda nibataholere esyonoono, haandi bachia ohwanguya ohwiidisa amabaanga.

¹⁷Olwohuba obaambulira oluhaanda bihaya eyoni lyoteka nilibona.

¹⁸Nae abasaacha bano beboonderera amabaanga kaabwe keene, bateka obulamu bwaabwe bweene.

¹⁹Bityo nilwo lu biba eyiri abo boosi abanyoola engaanga mu hunyaka; abahayinyoole, yahabeete.

²⁰Amakesi kahuumulira mu kono ly'aakulu hu ngira; kasiingisira ekono lyaako mu siito.

²¹Kalomalomera mu kono ly'aakulu hu biruwa bibeengiriramo mu siko nikaboola kati:

²²“Eng'we abataali neende amakesi, mwahaake yeena ohudaha obutamanya? Nae abalekeeresi bahaake yeena ohusaangaliraanga mu bulekeeresi bwaabwe neende abasiru ohusyuulaanga ohumanya?

²³Tekerese ninjolobya; bone, njia ohubakerakira bulai; njia ohukera mumanye emboosi chaange.

²⁴Olwohuba mbalaangire mani mwaahaya ohutekeeresa, ngoloole omuhono kwaange nae abulao odeebereyo,

²⁵mwaahaya ohuwulira engeraka chaange choosi, mwaahaya mboolobye nabudiidi.

²⁶Mani syesi njia ohubacheha nimulikwa mu masira; njia ohubadyaabuhira oluteengo nilwahabakweemo,

²⁷oluteengo nilwahabakweemo koti omuyaka, haandi amasira nikaheeche koti esifuusye, engisa neende obuchuuni nibwahabakweeho.

²⁸Mani ao, bachia ohunaanga, nae haba sindahabakobolemo; bahangoonye bulai muno, nae haba sibahanjakaane.

²⁹Olwohuba basyuula ohumanya haandi sibaheengao ohutya Omwaami.

³⁰Haba si badaha kata mbakerakire, mani mwalekeeresa ohwolobya hwaange hwoosi.

³¹Sakira mwahanyoole omukabo kuhoyera ebiholwa byaabwe mani mwebwaaba ohulya olukwe hweeng'we beene.

³²Olwohuba esiita abaandu batali neende obumanyirifu, nihwo ohwechuuhira amakesi, haandi obutadeebayo, nihwo ohusihirisa abasiru.

³³Nae oyo otekeeresa ebyaange, anabecheenge mu muleembe, haandi anabecheenge bulai, ataali ohutya esyonoono syoosi.”