Read saamia Engaado 11 Bible Online

Engaado 11 - saamia bible

Engaado 11

¹Omwaami haba saadaha abaandu beehoonyera ebikero bihyaamu, nae asiima abo abehoonyera ebikero byadyeeri.

²Ohwehuduumbasa huleeta ohudiirwa esoni; nae obuloonga nibwo amakesi.

³Obulai bw'abaandu baluungifu bubeemereramo, nae obuhyaamu bw'abaandu balyaanga bubasihirisa.

⁴Obuyiinda bubulamo engaanga yoosi hu ludaalo lw'ohufwa, nae obuluungifu buwonia obulamu bwao.

⁵Obuluungifu bw'omuundu mulai bukolola obulamu bwae, nae omuundu mubi, yesihirisa omweene.

⁶Obuluungifu bw'abaandu baluungifu bubawonia,

⁷Omuundu mubi naafwa, ebiindu bi yali n'asuubira bisihirira, haandi esuubi ly'omuundu otatya Nasaae lya bihaya.

⁸Omuundu muluungifu awonisibwaanga ohutula mu bidinyu, nae omuhola-mbi niye obikwaamo.

⁹Omuundu otatya Nasaae alomaloma ebiindu bisihirisa abaasye, nae abaandu baluungifu, ohumanya hubawonia.

¹⁰Ebiindu nibichiira abaluungifu bulai, esiko nisisangaala, haandi ababi nibafwa yibao esiyoka sy'omweehoyo.

¹¹Abaandu baluungifu baleetera esiko ehabi, nae emboosi ch'abahola-mbi, chisireetera ohusihirira.

¹²Oyo olekeeresa abaasye abulamo amakesi, nae omuundu muwulisi awuleera-buwuleera.

¹³Oyo okeesa obumoonyi, atuumbula ebyaama, nae omuundu mweesikwa mu mwooyo, awuleera-buwuleera.

¹⁴Abaandu basihirira nibabula okeraka; nae aali abakeraki baangi, ao niwo yi muleembe kuba.

¹⁵Oyo owimiirira omuundu yataamanyire yaheyiichulise, nae oyo otadaha ohweyiingisa mu by'abaandi niye owahanyoole omuleembe.

¹⁶Omuhasi w'ehabi yeeswamo oluyaali, haandi abasaacha b'esinani banyoola obuyiinda.

¹⁷Omuundu w'esisa omweene yeenyoolera engaanga, nae omuundu mwaalaba, omweene yechuunia.

¹⁸Omuhola-mbi yebacha omweene ati achia ohunyoola omusaara, nae oyo ohola ebiluungifu, anyoola omusaara kw'elalira.

¹⁹Oyo owomiirira mu buluungifu yahabe omulamu, nae oyo okonyeresa ohuhola ebibi yahafwe.

²⁰Omwaami haba saadaha abaandu bali neende ebibaaso bidoondobanu, nae asangaalira abahola ebiindu byoolerefu.

²¹Ataali ohukana-kana hwoosi, abahola-mbi bachia ohusaandisibwa, nae abaluungifu bachia ohuwonisibwa.

²²Omuhasi obula esaambo ali koti esaabbu mu lyoolu ly'embiichi.

²³Abaandu baluungifu beekoomba ebiindu bilai byoong'ene; nae esuubi ly'abahola-mbi nilyo etima ly'Omwaami.

²⁴Baliwo abaandu bakaba ataali ohudeeba, bemeeda ohuba abayiinda; haandi wabaao abaandi abatanyala hukaba, badoong'a sa nibemeeda ohuba abamanani.

²⁵Omuundu mukabi yahabe omuyiinda, haandi oyo oberesa abaandi obuhoonyi, yesi bahamuhoonye.

²⁶Oyo owiima abaasye emwo, bahamubwaabe, nae oyo okusaho abaasye emwo bahamudahise ehabi.

²⁷Oyo okoonya esiindu silai, abaasye bahamusiime, nae nokoonya esibi, esibi nisyo si wahanyoole.

²⁸Oyo oweesika obuyiinda bwae yahahoohe, nae omuluungifu yahanyirire koti omusaala kuloha.

²⁹Oyo oleetera abomu nyuumba yae ebidinyu, sibulao esiindu si yahadoong'e nasyo, omusiru yahahalaabanire ow'amakesi.

³⁰Ebyaamo by'obuluungifu nibyo obulamu, nae egiili limalao obulamu.

³¹Nikali mbwe abaandu baluungifu banyoola omukabo ku bahoyera hu syaalo, nae ababi neende abahola-mbi nibo abatahanyoole omukabo kubahoyera!