Read saamia Engaado 12 Bible Online

Engaado 12 - saamia bible

Engaado 12

¹Oyo odaha ohukerakirwa adaha ohumanya, nae otadaha ohukerakirwa musiru niye.

²Omwaami asiima abaandu balai, nae abalya olukwe mu baandi, abadiisa omusaango.

³Omuundu haba sahulahulana mu huhola ebibi, nae omuundu muluungifu niye ohulahulana yoomira.

⁴Omuhasi mulai niye oluyaali lwa wamwe, nae omuhasi odiisa wamwe esoni ali koti obulwaae buhomakira mu makuumba.

⁵Ebibaaso by'omuundu muluungifu byadyeeri nibyo; nae engeraka ch'abaandu babi chobubacha.

⁶Emboosi ch'abaandu babi ch'obutemo, nae abaluungifu balomaloma ebiwonia abaandu.

⁷Ababi basihirira mani yaabulao okobola mu makulu kaabwe, nae abomu nyuumba y'abaluungifu badoong'ao.

⁸Omuundu mwehaliirisi asiimwa, nae ow'ebibaaso bidoondobanu alekeereswa.

⁹Omuundu muloonga odidiihanira omweene ebyohulya byae, ahira owehuduumbasa nae haba saali neende esyohulya.

¹⁰Omuundu muluungifu adeeba hu bisolo byae, nae esisa sy'omuundu mubi nisyo obwaalaba.

¹¹Oyo olima eloba lyae yahabe neende ekesa liingi, nae oyo oloondakana neende ebibulamo obuhoonyi, abulamo amakesi.

¹²Omunaara kw'abaandu babi kufuniha mani kwaakwa aasi, nae omusiingi kw'abaluungifu kweema nikwomiirire.

¹³Emboosi ch'omuundu mubi nicho omuteego kumudiira, nae omuluungifu awona ebidinyu.

¹⁴Omuundu anyoola omusaara okuchanakana neende enomanoma yae ndai, haandi ohudidiihana hwae hulai humukobolera.

¹⁵Ebiindu bi musiru ahola, omweene abona ati bilai, nae omukesi awulira bi bamukerakira.

¹⁶Omusiru n'anyoolera, buli muundu amanya, nae omukesi yeebulerera sa kata neende bahamunyeka.

¹⁷Oyo olomaloma obwadyeeri yeekesa obwadyeeri, nae omubacha yeekesa obubacha.

¹⁸Oyo olomaloma n'atehaliriise, emboosi chae chiri koti olugaanga lufumita abaandi, nae emboosi ch'omukesi chileeta obuwonia.

¹⁹Emboosi ch'obwadyeeri chiyiindira endaalo choosi, nae echobubacha haba sichiyiindira.

²⁰Abo abatekeha mu myooyo kyaabwe ohuhola ebibi, beebacha abeene, nae abo abatekeha ohuhola ebilai balisangaala.

²¹Abaandu baluungifu haba sibahakweeho esibi, nae abahola-mbi beechulanaho ebidinyu.

²²Omwaami saadahiraho elalira abalomaloma eby'obubacha, nae asangaalira abahola ebiindu mubwadyeeri.

²³Omuundu muwulisi haba siyekesa buli siindu si amanyire, nae abasiru beekesa obutamanya bwaabwe.

²⁴Ohudidiihana neende esinani hukera waaba neende obunyala, nae obukata bukera waaba omuwaambe.

²⁵Ohweyendeherera huleeta engisa, nae emboosi ndai yileeta esangaalo.

²⁶Omuundu muluungifu yeebwaaba esyonoono, nae omubi akwiisa abaasye mu sibi.

²⁷Omuundu mukata haba sanyoola syayiima, nae ohola neende esinani anyoola eby'obuyiinda biingi.

²⁸Obuluungifu buleeta obulamu, nae obulyaanga buleeta ohufwa.