Read saamia Engaado 13 Bible Online

Engaado 13 - saamia bible

Engaado 13

¹Omwaana mukesi awulira ohukeraka hwa laatang'ene, nae omwaana muhyaamu haba satekeeresa nibamwoolobya.

²Omuundu mulai anyoola ebilai bitula mu nomanoma yae, nae abahobi beekoomba ohuhola eby'obwaalaba.

³Oyo omanyirisa bi alomaloma awonia obulamu bwae; nae owebbwangula bbwangula neende emboosi omweene yereetera ohusihirira.

⁴Omuundu mukata haba sanyoola bi yekoomba, nae omuundu ohola neende esinani anyoola obuyiinda.

⁵Omuundu muluungifu yebwaaba obubacha, nae omubi ahola eby'esoni haandi yemalamo oluyaali.

⁶Obuluungifu buliinda omuluungifu, nae esyonoono sikwiisa abahola-mbi.

⁷Baliwo abeeyira koti abanyali, nae babulaho esiindu syoosi; haandi wabaao abeeyira koti abamanani, nae bayiinda muno.

⁸Obuyiinda bu muundu ali nabwo nibwo obulinunula obulamu bwae, nae omumanani abula engeri yohweewoniamo.

⁹Obulafu bw'abaluungifu bwaaduha, nae ababi bali koti etaara lisimire.

¹⁰Ohwehuduumbasa huleeta ebidinyu, nae sy'amakesi ohufukiirira ohukerakirwa.

¹¹Obuyiinda bw'onyoola bwaangu, bwosi buwaao bwaangu, nae obuyiinda bw'onyoola kala-kaala n'ohola emirimo nibwo obwemeeda.

¹²Ohutaba neende esuubi, huleeta ebibaaso bibi, nae onyoola esiindu si yekoomba akobolamo obulamu.

¹³Oyo olekeeresa ohukerakirwa, omweene yereetera ohusihirira, nae oyo odiira ebilagiro, yahanyoole omukabo.

¹⁴Enjekesa y'ab'amakesi niyo enjaako y'obulamu, yiwonia omuundu mu miteego ch'ohufwa.

¹⁵Amakesi kaleeta oluyaali, nae engira y'ababi niyo ohusihiriswa haabwe.

¹⁶Abaandu bali neende amakesi babaasa mberi hu bahola esiindu, nae omusiru yekesa obutamanya bwae.

¹⁷Wamwaanda mubi aleeta ebidinyu, nae omutumwa mweesikwa aleetao omuleembe.

¹⁸Oyo otadaha ohukerakirwa, yereetera obumanani neende ohumalamwo oluyaali, nae oyo ofukiirira ohwolobwa yeswamo oluyaali.

¹⁹Omuundu n'anyoola esiindu si yekoomba asangaala; nae ohufudatira esyonoono syoomusiro eyiri abasiru.

²⁰Oyo okeenda neende abaandu balimo amakesi, yesi mukesi niye, nae owaamba obwiicha neende abasiru, alinyoola ebidinyu.

²¹Ebidinyu biloonda ababi buli yi bachiira, nae ohuhula-hulana nihwo omukabo kw'abaluungifu.

²²Omuundu mulai anyoola obuyiinda bu yahalehere abeechuhulu bae, nae abaluungifu nibo abahayire obuyiinda bw'abahola-mbi.

²³Endalo ch'abamanani chawumamo ebyohulya biingi, nae ababula obwadyeeri sibabakanya ohubirya.

²⁴Oyo otakolola omwaana wae, saaba amudaha, nae oyo odaha omwaana wae amukolola.

²⁵Omuundu muluungifu anyoola ebyohulya bimumala, nae omuundu mubi enjala yimuluma buli ludaalo.