Read saamia Engaado 17 Bible Online

Engaado 17 - saamia bible

Engaado 17

¹Esidiidi sy'olya neende omuleembe, kata syahaba esyoomeranu sihira ohulya esidyaalo mu daala lirimo obusoolo.

²Omuhalaabani ohola emirimo neende amakesi, achia ohutuka omwaana womungo ohola eby'esoni, haandi achia ohunyoola omukabo koti omwibulana.

³Esaabbu neende efeesa biteemerwa mu muliro kw'etanuuru, nae Omwaami niye oteema emyooyo ky'abaandu.

⁴Omuhola-mbi atekeeresa emboosi mbi; haandi omubacha niye odaha ohuwulira eby'obubacha.

⁵Oyo oduulira omumanani alekeeresa Omuloongi wae; haandi oyo osangaalira amasira k'owaasye, yesi amasira kahamwoleho.

⁶Abakofu beehoyera mu beechuhulu baabwe, haandi oluyaali lw'abaana nibo abeebusi baabwe.

⁷Ohulomaloma emboosi chirimo amahuluundu, haba sichihoyera abasiru; nae omuundu w'oluyaali haba s'ahoyera ohuba omubacha.

⁸Baluwo abaandu babaasa bati ohulya asowa huli koti ekina ly'amaya, buli yachiira achia ohuhula-hulana.

⁹Oyo oleheramo ebibi by'abaandi, okoonya ohudahwa, nae oyo owichulisa abaandu ebibi byaabwe, akabuhania aboobwiicha.

¹⁰Omuundu w'amakesi yoolobiswa ehabi lala lyoong'ene niyeeka, ohuhira omusiru ahuywa endawusi emia ndala.

¹¹Omuundu mubi buli siha akoonya ohujeema, mani bahamutumire wamwaanda mwaalaba ohumudiira.

¹²Silai ohubukaanana neende eryaaka ehasi libatusireho omwaana, nae otabukanane neende omusiru n'ahola eby'obusiru byae.

¹³N'oholera esyonoono omuundu ohuholeere esilai, esyonoono haba sisyahatule mu ngo wao.

¹⁴Ohuchaaka obusoolo huli koti ohwikulira amaachi omuhula; mani otayinganaanga obusoolo buhaye ohukwaao.

¹⁵Oyo olehuula omuhola-mbi, neende oyo oheengera omuluungifu omusaango ohumuhira, boombi Omwaami abasyuula.

¹⁶Eseende chi musiru atuunga mu hweeka chikota bihaya, olwohuba haba saanyala ohubimanya.

¹⁷Abeecha baheerana buli siha, haandi abebulanwa b'ohuhoonyana mu budinyu.

¹⁸Sy'obusiru ohwemerera omuundu wuundi, haandi ohweeyama oti niiwe ochia ohutuunga ekobi.

¹⁹Oyo odaha obusoolo omweene yekoonyera ebidinyu; haandi oyo owehuduumbasa akoonya ohusihirira.

²⁰Omuundu w'ebibaaso bidoondobanu haba sahulahulana, haandi ow'enomanoma mbi yereetera amasira.

²¹Omwaana musiru adiisa laatang'ene engisa; haandi laatang'ene mwaana musiru abula neende esangaalo.

²²Omwooyo musangaafu kwosi malesi kawonia, nae omwooyo kweeyendeherera kung'aya omuundu.

²³Omuyaasi mulyaanga afukiirira ohulya asowa neende omwooyo kwoosi, mani yadondobania obwadyeeri mu huheenga omusaango.

²⁴Omuundu mumanyirifu achooma eyiri amakesi, nae omusiru achaaka sino neende sira.

²⁵Omwaana musiru adiisa laatang'ene engisa, haandi aleetera ng'ina obuchuuni.

²⁶Haba sisilai ohutuungya omuundu muluungifu, haandi sibi ohusaandya omuundu oholere esiindu silai.

²⁷Omuundu mukesi yetuka mu nomanoma, haandi otabbwanguha neende emboosi niye omuwuliri.

²⁸Omusiru awuleera bahamulaanga bati mukesi; oyo owuleera yahaya ohulomaloma, yahabalwa koti omuwuliri.