Read saamia Engaado 18 Bible Online

Engaado 18 - saamia bible

Engaado 18

¹Abeeyawula hu baasye baba beekoonyera ebyaabwe boong'ene; haandi sibafukirisania neende bi baandu baandi bamanyire koti ebyadyeeri.

²Omusiru haba sadeebayo ohumanya esiindu oba daawe; nae adaha sa ohulomaloma esiri mu mwooyo kwae.

³Ohuhola esyonoono huleeta esoni chosi; haandi ohwonoona huleeta ohumalamwo oluyaali.

⁴Emboosi chi muundu alomaloma chiri koti amaachi k'olusiba; haandi yi makesi kachaakira yiri koti omwaalo kuhulukusa.

⁵Haba sisilai ohukwiira omuhola-mbi, oba ohuheengera omuundu muluungifu omusaango ohumuhira.

⁶Emboosi ch'omusiru chileeta ohuyiingana, haandi aba yekoonyera ohuhuywa.

⁷Omusiru bi alomaloma nibyo ebimusihirisa, haandi emboosi chae nicho omuteego kumudiira.

⁸Emboosi ch'omumoonyi chinyunyuulira muno owulira; chiihirira aasi ohwoola mu nda bweene.

⁹Oyo ohola emirimo kyae neende okusinye ali nasilala neende oyo ochisihirisa.

¹⁰Eliita ly'Omwaami munaara kw'amaani; abaluungifu niyo yiberuhira mani nibanyoola obweyikamo.

¹¹Abayiinda babaasa bati obuyiinda bwaabwe nibwo esiko syaabwe sy'amaani, haandi bati nibwo olukaka luleeyi lu bakairira.

¹²Ohwehuduumbasa nihwo ohutaangirira ohusihirira, nae obuloonga nibwo obutaangirira ohunyoola oluyaali.

¹³Omuundu okobolamo n'asisiiri ohuwulira, aba omusiru haandi adiirwa esoni.

¹⁴Obugumu bw'omuundu bukera yesimiirisa mu bulwaae; nae n'atusaho omwooyo, esuubi nilikotao.

¹⁵Abaandu bamanyirifu bakoonya ohumanya, haandi abaandu bakesi bakoonya ohumanya.

¹⁶Esiyaanwa sy'omuundu simwiikulira engira haandi sikera yoola eyiri abaandu bahunuufu.

¹⁷Omuundu otaangira ohulomaloma mu siina niye obaasa ati wadyeeri, ohwoola lu wuundi yoola ohumuyiingania.

¹⁸Eha yakamya ohuyiingana, haandi yiheengera ab'amaani omusaango.

¹⁹Ohuhoonya omwibulana huli koti esiko sy'amaani, nae ohusolana neende omwibulana huli koti ohweyikalira erwaanyi w'enyuumba yae.

²⁰Omuundu ahoyere ohugumira ebiindu bi alomaloome, agumire ebiindu bi alomaloome.

²¹Olulimi luli neende obunyala bw'ohuleeta ohufwa oba obulamu, mani omuundu abecheenge omwetekefu ohufukiirira bi alomalome bileeta.

²²Oyo onyoola omuhasi w'ohudeehya aba anyoolere esiindu silai, haandi Omwaami aba amubereese ehabi.

²³Abamanani balomaloma neende obuloonga, nae abayiinda bakobolamo n'ohuhabuha.

²⁴Baluwo abeecha baandi abekaadirisa mbwe b'obwiicha esiha sidiidi sa, nae wabaao omwiicha ahwomiiriraho ohuhiraho kata omwiibulana.