Read saamia Engaado 19 Bible Online

Engaado 19 - saamia bible

Engaado 19

¹Omumanani oholera hu bwadyeeri ahira omubacha musiru.

²Haba sisilai ohuhola esiindu notabaasire mberi, haandi ohutesimirisira ebiindu hukera watula hu ngira ndai.

³Omuundu n'ahola eby'obusiru omweene yereetera ohusihirira, mani haandi n'achaaka ohwolobya Omwaami.

⁴Omuyiinda yemeeda sa ohuba neende abeecha bayaaha, nae omumanani abeecha bae bamwiiruhaho.

⁵Oyo otusa obuloli bw'obubacha yahasaandisibwe, haandi oyo owebbwangula neende obubacha abula obuchiiro.

⁶Baangi muno abakoonya obuhoonyi eyiri omuundu mukabi, haandi buli muundu yekoomba ohuba omwiicha w'omuundu oberesa ebiyaanwa.

⁷Kata abeeho b'omuundu mumanani babula obuhoonyi yaali; sakira abeecha bae bamwiiruhaho. Ateemaho koti lu anyala ohubekweeda, nae nibawaao haba sibakobola haandi daawe.

⁸Oyo onyoola amakesi omweene yeedaha; haandi oyo owichulisa bi yeeka achia ohuhula-hulana.

⁹Oyo otusa obuloli bw'obubacha yahasaandisibwe, haandi oyo owebbwangula neende obubacha yahasihirire.

¹⁰Omusiru haba saahoyera ohumenya mu bulamu bulai, nasilala haandi omuwaambe haba saahoyera ohutuka abaana b'abatuki.

¹¹Ow'amakesi haba s'anyoolera bwaangu, haandi luba oluyaali lwae ohutadeeba hu abamuholera esibi.

¹²Etima ly'omutuki liri koti ohuwoola hw'edalangi, nae esisa syae siri koti olume lunyisa obunyaasi.

¹³Omwaana musiru aleetera laatang'ene ohusihirira, haandi obusoolo bw'omuhasi nibwo efula yitaakama.

¹⁴Enyuumba neende obuyiinda obitusa hu laatao, nae ohunyoola omuhasi muwuliri siba esiyaanwa ohutula eyiri Omwaami.

¹⁵Omuundu mukata yeyalisa endoolo nyiingi muno, nae oyo otahola emirimo yahalumwe enjala.

¹⁶Oyo oliinda ebilagiro, aliinda obulamu bwae; nae oyo olekeeresa emboosi yahafwe.

¹⁷Oyo okwiira abamanani esisa, ali koti oweyosa Omwaami, Omwaami achia ohumutuunga ohweema hu biholwa byae.

¹⁸Kolola omwaana wao ebiha nibisisiiri, ohaye ohumufwiirwa.

¹⁹Omuundu w'etima liingi, engisa yahamunyoole; olwohuba kata nomuwonia ehabi litaangira, oli neende ohumuwonia ehabi liindi haandi.

²⁰Tekeresaanga ohukerakwa haandi ofukiirire ohweeka, hu onyale ohuba neende amakesi buli ludaalo.

²¹Abaandu batekeha ebiindu biingi muno eby'ohuhola, nae Omwaami bi adaha nibyo obyolereera.

²²Esikera omuundu yekoombwa nisyo esisa syae, haandi kata omumanani ahira omubacha.

²³Ohutya Omwaami huleeta ohuyiindira; haandi oyo oli nahwo aba omugumu; esidinyu haba sisyahamwooleho.

²⁴Omukata ata omuhono mu nuungiro yenula, mani yahaya ohuta ebyohulya muhanwa.

²⁵Saandya omulekeeresi, mani abaloonga neende amakesi banyoole elyeeko, kerakira omuundu muwulisi, mani achia ohwemeeda amakesi.

²⁶Oyo osaandya laatang'ene, oba yeerusa ng'ina, niye omwaana wereetera esoni haandi yemalamo oluyaali.

²⁷Mwaana waange, niwaakama ohukerakirwa wahebirire kata ebiindu bi wali niwamanya.

²⁸Omuundu otusa obuloli butaalimo obuhoonyi, alekeeresa obwadyeeri, haandi omunwa kw'abahola-mbi kwekoomba ohuhola ebibi.

²⁹Abalekeeresi bahahirwe omusaango, haandi abasiru bahahuywe endawusi.