Read saamia Engaado 22 Bible Online

Engaado 22 - saamia bible

Engaado 22

¹Nooli owohudoolao akatikaati w'eliita lai neende obuyiinda, doola eliita lai, haandi ohukwiirwa esisa huhira efeesa oba esaabbu.

²Omuyiinda neende omumanani bali neende esiindu sibambaania alala; Omwaami niye owabaloonga boombi.

³Omuundu mumanyirifu abona esidinyu nisiicha mani yeyikulira siamubitaho, nae otaali neende amakesi yemeeda-bwemeeda mani nasikwaamo.

⁴Omukabo kw'obuloonga neende ohutya Omwaami nikwo obuyiinda neende oluyaali neende ohuyiindira.

⁵Amawa neende emiteego biri hu ngira y'abaandu badoondobanu; nae oyo odaha ohweliinda, abyebwaaba.

⁶Yekesa omwaana wao amanye koti lu ahoyeere ohumenya, mani yahasiichulise mu bulamu bwae bwoosi.

⁷Abaandu bayiinda nibo abatuka abamanani, haandi oyo oweyola aba omuwaambe w'omuundu omweeyosa.

⁸Oyo otaaka obutali obwadyeeri yahakese amasira, haandi ohwaalabira abaasye hwaahakame.

⁹Oyo w'ehabi oli neende omwooyo kw'obukabi, olwohuba akabiraho abamanani hu eby'ohulya byae.

¹⁰N'omalao obulekeresi, ohulwaana hwosi nihutulao, mani obusoolo neende amanyeko nibyaakama.

¹¹Oyo owaheera ohweliinda, haandi olomaloma emboosi ch'esisa, achia ohuba omwiicha w'abatuki.

¹²Omwaami yehaliirisa mani yaabona koti obwadyeeri buliindwa, nae asihirisa obukodyo bw'abaandu babi.

¹³Omukata omweene aboola ati, “Erwaanyi yiriyo edalang'i! Yicha ohunjitira hu ngira!”

¹⁴Ahalimi h'omuhasi mucheke buko bwooloberefu nibwo; abo ba Omwaami anyoolerera babukwaamo.

¹⁵Sya buli ludaalo omwaana muyere ohuhola ebiindu bitaalimo amakesi, Nae ohukololwa buli siha hubeekesa ohumanya esy'ohuhola.

¹⁶Oyo ofwiinyirira abamanani n'adaha ohwemeeda obuyiinda omweene, oba oyo oberesa abayiinda ebiyaanwa, omweene yelaangira obumanani.

¹⁷Tekeresa mani owulire emboosi chi baandu bakesi balomaloma, mani taaho omwooyo omanye ebiindu bi hweekesa.

¹⁸Siba esilai noonyala ohuchiichulisa mu mwooyo kwao, noonyala ohuchilomaloma ataali obudinyu bwoosi.

¹⁹Ndaha wesike Omwaami, sakira ndi ohuhweekesa bino enyaanga yino.

²⁰Hwandikiire engaado amahumi kadatu, echirimo ohweeka neende ohukerakirwa.

²¹Njia ohuhweekesa omanye obwadyeeri bweene. Mani nibahutuma ohubukoonya, onaakoboleenge n'omalire ohumanya obwadyeeri bulai.

²²Otayayaanga omumanani, olwohuba haba siyenyala, oba wafwiinyirira omumanani oli mu siina;

²³olwohuba Omwaami niye ochia ohubalwaanira mani achia ohutiisa buli muundu oli ohubatiisatiisa.

²⁴Otaholaanga obwiicha neende abaandu b'etima, oba waholera alala neende abaandu b'obwaalaba.

²⁵Ataali ao, ochia ohweeka ebiima byaabwe mani okiyandireho ohaye ohukitulamo.

²⁶Otabechaanga mulala hu abo abeeyama, ohutuunga amakobi k'abaandu baandi.

²⁷Nibihuhaya ohutuunga, bachia ohuhudiiraho kata neende esitaanda.

²⁸Otasihuulaanga amakoonge k'olwaaho ka bakuukaao bataaka.

²⁹Omuundu ohola emirimo neende esinani, achia ohuba alala neende abatuki; haba saahoyera ohuba alala neende abaandu ba buli ludaalo.