Read saamia Engaado 24 Bible Online

Engaado 24 - saamia bible

Engaado 24

¹Otadiiriraanga abahola-mbi embaliha, noomba wekoomba ohuba alala nabo;

²olwohuba babaasa eby'obwaalaba, haandi balomaloma ebiindu bidoondobania abaandu.

³Enyuumba yeema hu musiingi kw'amakesi, haandi yoombahwa ohweema hu humanya.

⁴Ebiseenge byao biichula neende ohumanya neende eby'engaanga byoosi neende eby'obuyiinda bisangaasa.

⁵Omuundu w'amakesi niye ow'amaani ohuhira oyo owehoonyera esirifu, haandi omuundu muwulisi ahira oyo oli neende amaani;

⁶olwohuba ohulwaana eye, sidaha mberi ohuhola hwa makesi, haandi yibaberesi b'amakesi baangi yibali, ao niyo yihunyiingira yi huli.

⁷Eby'amakesi bihira eyale muno omusiru ohumanya; haandi sibulao esiindu si anyala ohulomaloma yibaheengera emisaango.

⁸Oyo otekeha ohuhola esibi bachia ohumulaanga bati, omuholi w'ebidinyu.

⁹Buli siindu si musiru atekeha ohuhola siba esyonoono, haandi abuundu haba si badaha omulekeeresi.

¹⁰Nooba omukata mu biha bi onyooleramo ebidinyu, ao amaani kao kaba amadiidi.

¹¹Yabina abo abali ohuyirwa ohwiitwa; wonia abo abali ohuchia ohusiinjwa bihaya.

¹²Nimuboola muti, “Bone, sino haba sihubeere nihusimanyire,” nae Nasaae omanyire ebiri mu mwooyo haba saasibona? Oyo oliinda obulamu bwao asimanyire, haandi achia ohuhuberesa buli mukabo ohweema hu biholwa byao.

¹³Mwaana waange, lya obuuhi, olwohuba bulai nibwo, haandi koti lu buuhi budoonya nibutula mumabbaangara k'obuuhi bunyunyuula n'ohoomba,

¹⁴manya oti nilwo lu makesi kanyunyuulira obulamu bwao; n'okanyoola, wahabe bulai mu bulamu bwao, haandi esuubi lyao haba silyahakame.

¹⁵Otaba koti abahola-mbi abaliindirira amadaala k'abaandu baluungifu; otayaaya edaala lyae.

¹⁶Olwohuba omuundu muluungifu kata yahakwa amahabi kataanu-na-kabiri, asiingirao buli habi li akwiira aasi; nae omuundu mubi, amasira kahamusihirise.

¹⁷Otasangaalaanga omusuku wao n'akwiireho obudinyu, haandi otehoyaanga nasyeluluuha mani yaakwa.

¹⁸Olwohuba Omwaami anyoolera naabona ati oholere otyo, mani yakamira ao ohumunyoolerera.

¹⁹Otafukiiriraanga abahola-mbi bakera wenyendeherera, haandi otebadiiriraanga ehali-hali;

²⁰olwohuba omuhola-mbi abula esuubi; haandi yahasime koti etaara.

²¹Mwaana waange, yiisaanga oluyaali mu Omwaami neende mu mutuki, haandi otaholeraanga alala neende abajeemu;

²²olwohuba amasira ohutula eyiri Omwaami neende eyiri omutuki kahabakweeho-bukwa, haandi abulao omanyire koti lu kahaake.

²³Haandi chino choosi ngaado echakaadwa neende abaandu bakesi. Ohwehubbira mu huheenga emisaango haba sisilai nisyo.

²⁴Oyo oboolera omuundu wahola esyonoono ati, “Obulaho omusaango,” abaandu bahamubwaabe, haandi buli muundu yahamusyuule.

²⁵Nae abo aboolobya abahola-mbi bahanyoole esangaalo, haandi bahabecheenge neende ehabi.

²⁶Oyo okobolamo esyadyeeri nisyo esilolero sy'obwiicha.

²⁷Taangira otekehetekehe bulai emirimo kyao ky'erwaanyi, otereese bulai endalo yao, mani huwoombahe enyuumba yao.

²⁸Otatusaanga obuloli ohuyiingania owaasyo ataali esifune syoosi, haandi otamulomalomaanga eby'obubacha.

²⁹Otaboolaanga oti, “Syesi ndahamuholeho esiindu sy'aholere; ndaheetuunge esiindu sy'aholere.”

³⁰Ndabita mu ndalo y'omuundu mukata, mu ndalo y'emisabbiibbu y'omuundu obulamo amakesi;

³¹bone, yali niyichuulemo amawa; yoosi niyisihiremo esiino, haandi olukaka lwaao lw'amakina nilukwiire aasi.

³²Ndayitingaala mani nimbaasa muno; ndayitingaala mani ndabaaho neende singerakirwa.

³³Wemeede okuunuheho, haandi wemeede okoneho, wemeede ohufuumba amahono mani owuluuheho,

³⁴obumanani bwahahuseete koti omunyaka, ahuseeta n'adiirire ebilwaaniso.