Read saamia Engaado 26 Bible Online

Engaado 26 - saamia bible

Engaado 26

¹Oluyaali haba siluhoyera omuundu musiru, koti lu munyiti kutahoyera ohubao mu siminyu oba efula mu ndaalo cheekesa.

²Ebibwaabo bitahuhoyera haba sibinyala huhudiira, biri koti obbiichubbiichu oba endikaaliki chibburuha-bburuha mani chaahaya ohukwa.

³Efaraasi chiri neende ohuhuywa, esuhiri ohunaalwa ehoba, nilwo lu baandu basiru bahoyerwa ohutoochwa endawusi.

⁴Esiteebo sy'omusiru otasikobolaangamo mu ngeri y'obusiru, hu wesi ohaye ohumufwaanana mu busiru.

⁵Ohutusaho omusiru omukobolaangamo koti lu ahoyera, hu anyale ohumanya ati esiteebo syae haba si sibeere esy'amakesi koti lw'abaasa.

⁶Oyo otuma omusiru ohuba wamwaanda aba koti owehengereho amakulu haandi yereetera ebidinyu.

⁷Omuundu musiru owehoonyera olukaado, ali koti omulema yehoonyera ohukulu hulema hulereecha bulereecha.

⁸Ohwiisa oluyaali mu muundu musiru, siri koti ohuboya ekina mu simulo.

⁹Omusiru owehoonyera engaado ch'amakesi, ali koti omumeesi oli ohweetusa eewa mu syaaba syae.

¹⁰Oyo opaangisa walukeenda musiru ohumuholera emirimo oba omumeesi, ali koti omulasi w'olusaale olasa buli muundu yeesi.

¹¹Omusiru aloondamo eby'obusiru buli siha, ali koti embwa eyilya ebiindu bi yisalire haandi.

¹²Omusiru ahirimo obusiru mulai hooho, ohuhira oyo owelaanga omweene ati mukesi niye.

¹³Omukata aboola ati, “Erwaanyi yiriyo edalang'i, siinyala ohutula mu nyuumba ohuchia ohuhola emirimo.”

¹⁴Omukata yekaluuhania-kaluuhania hu sitaanda syae, koti olwiiki lukaluuhanira hu pata chaalwo.

¹⁵Omukata adoong'ia ebyohulya mu sikaye; mani yekanyiirisa naabita mu munwa kwae.

¹⁶Omutaka abaasa ati mukesi niye, ohuhira abasaacha bataanu-na-babiri abanyala ohutereesa emboosi.

¹⁷Omuundu yeyingisa mu busoolo butamudiiraho, ali koti omuundu adiira mu matwi k'embwa yatatuka.

¹⁸Koti omulalu osukuna amaanda kaaduha, oba obusaale, neende ebilwaaniso bibi,

¹⁹oyo yesi obacha owaasye mani yaboola ati, “Mbeere ngachula sa!”

²⁰Olwohuba eehwi nichibulaao, omuliro kwosi nikusima; haandi omumoonyi nabulao obusoolo bwosi nibwaakama.

²¹Koti amaanda kakera esyoosyo nisiniooha haandi eehwi chakera omuliro nikwaaduha, nilwo lu muundu musoolani anioohesa obusoolo.

²²Emboosi ch'omuundu mumoonyi chinyunyuula muno; chiihirira aasi koti ebyohulya bihirira mu nda.

²³Emboosi ndai chinyunyuula echeekisa mu mwooyo mubi, chiri koti esikaye sibabahaho efeesa.

²⁴Omwebachirisi akisa ohusyuula hwae mu mboosi ch'ohubachirisa, haandi abiiha obubacha mu mwooyo kwae.

²⁵Naalomaloma emboosi ch'esisa, haba sochifukiirira, olwohuba omwooyo kwae kulimo eby'omusiro bitaanu-na-bibiri.

²⁶Naakisa ohusyuula hwae mu bweebachirisi, ebyonoono byaahola bicha ohubituumbula alafu.

²⁷Oyo oyaba obuko, achia ohubukwaamo; haandi oyo ochaaka ohusindikisa okukina, kuchia ohumukobolera.

²⁸Omuundu mubacha asyuula abaandu babacha, haandi ohweniinia-niinia huleeta ohusihirira hwoong'ene.