Read saamia Engaado 27 Bible Online

Engaado 27 - saamia bible

Engaado 27

¹Otefumiaanga hu binabeeo muchuli, olwohuba okoterwe ebinakweeo muchuli.

²Lehaanga abaandu baandi, kata abateende bahufumia, nae ewe omweene otefumiaanga.

³Ekina neende omusenye bisito, nae obudinyu bu musiru akwiisao busito ohuhiraho byoombi.

⁴Egiili neende etima byaalaba nibyo haandi bisihirisa; nae haba sobikerania hu mbaliha.

⁵Oyo ahuboolera obuhyaamu bwao mani yaahaya ohubuhukisa, ahira oyo ahukisa naadaha ohuhweekesa ati ahudaha.

⁶Wesike omwiicha wao ohwoolobya, nae haba otesika omusuku wao ohukinia.

⁷Nooba niwikuute, onyala ohusinyiha obuuhi bw'enjuhi, nae nooba omuyala, kata esiindu sihahaata osilaanga esinyunyuula.

⁸Omuundu okota naatula mu daala lyae, ali koti eyoni likota ohutula mu siyu syaalyo.

⁹Amafuta k'ohwebaha neende ebiwunya esing'aari bisangaasa omwooyo, nae obudinyu bumala omuleembe mu bulamu.

¹⁰Otakabuhanaanga neende omwiicha wao, noomba neende omwiicha wa laatao; haandi otakonyaanga mwaanamao n'onyoolere ebidinyu. Owaasyo oli aambi, ahira mwaanamao oli eyale.

¹¹Mwaana waange, bechaanga ow'amakesi, mani wusangaseenge, hu nyale ohunyoola esy'ohukobola mu baandu baanyeka.

¹²Omuundu mukesi abona ebidinyu nibiicha mani omweene yeekisa; nae oyo otabaasa asikwaamo yeeyichulisa luunyuma.

¹³Silai ohubukula engubo yi muundu asiinga naadaha ohwemerera omuundu y'atamanyire, haandi lehe abe neende ekobi ly'ohwemerera bawalukeenda.

¹⁴Oyo osimuha echuli mu mabwiibwi, mani yahuumula mu kono ly'aakulu ohuheesa owaasye, bamuyira koti obwaabwa.

¹⁵Omuhasi mulekeresi ali koti efula yikwa mani yahaya ohwaakama;

¹⁶sidinyu muno ohumuyenjeesa, koti luwahayenjeesa omuyaka kuwuucha, oba ohwomiisa amafuta mu mahono.

¹⁷Esyuuma nisyo esyakala esyuuma syaasye, haandi omuundu niye owekesa omuundu waasye.

¹⁸Oyo owakira omutuli, yahalye hu byaamo byakwo, haandi oyo ohalaabanira omwaami wae, yaheswemo oluyaali.

¹⁹Koti omuundu yebona n'atingaalire mu maachi, nilwo lu mwooyo kwae kweekesa koti lwaali.

²⁰Koti lu emakoombe yitechula abafu, nilwo nasilala koti emoni chitajoong'a ohwekoomba.

²¹Koti lu efeesa neende esaabbu biteemwa neende omuliro kw'esiroombe, nilwo lu muundu yibakinia anyala ohuteemwa.

²²Omusiru kata yahaswakirwa mu sinu neende omuswakiro yaaswakirwa alala yaaba aambi ohufwa, nae haba soonyala wamumalamo obusiru.

²³Manya bulai ebyaayo byao koti lu biri, haandi obaase hu bisolo byao,

²⁴olwohuba obuyiinda haba sibuyiindira endaalo choosi; haandi obwaami haba sibuyiindira endaalo choosi.

²⁵Obunyaasi nibukofula mani obuundi bwaaloha, neende obwohulugulu nibubuuswa alala,

²⁶ao ochia ohwesonera engubo ohutula mu bwooya bw'amakoondi kao, haandi embusi chao ochia ohuchikusa okule eloba.

²⁷Ochia ohunyoola amabeere kahumala, ewe neende abomu nyuumba yao haandi abahalaabani bao boosi baachia ohukang'waho.