Read saamia Engaado 30 Bible Online

Engaado 30 - saamia bible

Engaado 30

¹Emboosi cha Aguri, omwaana wa Yaake owa Maasa, bi yaboolera Yityeeli, eyiri Yityeeli neende Wukali, ati:

²Mubwadyeeri bweene, niise omuundu ohiramo obusiru. Haandi mbulamo amakesi k'omuundu.

³Haba sinjekaanga amakesi, oba ndamanya ebidiira hu Nasaae.

⁴Wiina mweene owali naniinire muukulu mani yeeha aasi n'atulayo? Wiina mweene owali n'afumbaate emboo mu syaaba syae? Wiina mweene owali n'aboyere amaachi mu ngubo yae? Wiina mweene owali n'atereo enjaho ch'esyaalo? Eliita lyae, niye wiina, haandi eliita ly'omwaana wae, nilyo naanu? Mubwadyeeri nooba n'omanyire!

⁵Nasaae yoseresa buli siindu sy'asuubisa; haandi Nasaae niye engabo yiliinda abo abamwesika.

⁶Otameedaanga emboosi chao chiindi hu mboosi chae, hu ahaye ohuhwoolobya, mani yekesa alafu obubacha bwao.

⁷Ewe Nasaae, husaba ebiindu bibiri, obimberese nisisiiri ohufwa:

⁸Tusireho elalira obutaali obwadyeeri neende obubacha; Otambechaanga obumanani noomba obuyiinda; nae mbereseenge ebyohulya neende ebyohwehoonya bi ndaha.

⁹Ataali ao njia ohwikuta muno, mani hwekaane, mani ndeebe endi, “Nasaae niye wiina?” Ataali ao njia ohuba omumanani, mani njibe, haandi nyaase eliita lya Nasaae waange.

¹⁰Otalomalomaanga bubi hu muhalaabani eyiri omwaami wae, ataali ao ohuhubwaaba, mani omusaango kuhuhire.

¹¹Baliwo ababwaaba balaata yaabwe haandi baahaya ohuberesa bang'inaabwe oluyaali.

¹²Baliwo abo abeene ababaasa bati boolerefu nibo nae bali neende ebyonoono bi bahoyeere ohweyolobya.

¹³Baliwo abaandu baandi abeene abebona bati b'akulu muno, haandi ababaasa bati b'akulu muno ohuhira abaandi boosi.

¹⁴Baliwo abo abehoonyera obwaalaba, abo, ameeno kaabwe kali koti amahaande, abetekeehe ohumalao abamanani hu syaalo, ab'obudahano ohutula hu syaalo.

¹⁵Ohwekoomba huli neende emboosi chibiri choong'ene, eyitaangira, “Mberese,” haandi eyohubiri, “Mberese.”

¹⁶Echo nicho emakoombe, neende omuhasi mukuumba, esyaalo syoomu esibulamo efula, neende omuliro kutaakama.

¹⁷Emoni ch'omuundu abisa emoni mu simwana neende ech'oyo olekeeresa ng'ina hoyerwa ohuchomolwaho mani engosya chaachirya.

¹⁸Biliwo ebiindu bidatu ebiihira ohumanya; mubwadyeeri bweene, biliwo bine bitaamanyire:

¹⁹engeri yi eeswi yibburuhiramo aakulu, engeri yi njuha yehuruudisiramo hu lwaanda, engeri yi meeri yinyoola engira yaayo mu nyaanja, neende engeri yi buheeri buchaakira akatikaati w'omusaacha neende omuhasi.

²⁰Yino niyo engeri y'omuhasi mucheke: alya, mani yamala yesimuula hu munwa, mani yaboola ati, “Sibulao esiindu si holere.”

²¹Biruwo ebiindu bidatu ebiteengya esyaalo; biruwo bine bi syaalo sitanyala ohwesimiirisa:

²²omuwaambe niyeehaswa ohuba omutuki, omusiru naaba neende buli siindu sy'adaha;

²³omuhasi musyuule n'anyoola omusaacha, haandi omuhasi omuhalaabani onyuula omuyiinda wae omusaacha.

²⁴Hu syaalo huliho ebiindu bine ebidiidi, nae ebiri neende amakesi maangi muno:

²⁵amake, kabula amaani nae keebiihira ebyohulya bi kanaalye mu siminyu;

²⁶ojiibo bwosi obutali neende amaani, nae bone, bweyoombahira obumenyo mu makina;

²⁷esike chibula omutuki, nae chihuumbira mu mukaanda;

²⁸embaakala nyaangu ch'ohudiira mani waachita mu mahono kao, nae chimenya mu madooho k'abatuki.

²⁹Biriwo ebiindu bidatu ebihuumba mani wekoomba; biri bine ebikeenda nibihuumba:

³⁰edalang'i eyihira ebisolo byoosi amaani haandi sibulao esisolo siindi siyitya;

³¹embwa nyiimi, embusi hole, ekulukulu daaywa, neende omutuki ohuumba niyeemirira abaandu bae.

³²Nooba n'oholaanga eby'obusiru, omweene niweehuduumbasa, oba nooba n'obasaanga ohuhola ebibi, owuleraanga mberi mani obaasa.

³³Olwohuba n'osacha amabeere, nonyoola amafuta, n'ofwiinya amoolu, ni omujusi kudoonya, haandi n'osangulula etima, n'otusamo obusoolo.