Read saamia Engaado 31 Bible Online

Engaado 31 - saamia bible

Engaado 31

¹Emboosi cha Lemueli, omutuki wa Masa, chi ng'ina yamweekesa:

²Siina, mwaana waange w'obusyaani? Siina mwaana waange w'obusyaani yindebula? Siina, mwaana waange w'obusyaani yindeyamira eyiri Nasaae?

³Amaani kao otakamaliraanga hu bahasi, basihirisa kata abatuki.

⁴Ewe Lemueli, haba sisihoyera abatuki, sisihoyera abatuki ohung'wa amalwa, oba abaami ohwekoomba buli siindu simeesa;

⁵ataali ao bachia ohung'wa mani beebirire amalako, mani beebirire ohuheengera abafwiinyirirwa omusaango bulai.

⁶Amalwa kaberesa omuundu odaha ohusihirira, neende efiini abo abali mu ngisa;

⁷lehe bang'we mani beebirire obumanani bwaabwe, mani beebirire elalira engisa yaabwe.

⁸Lomalomeraanga banaambula-buchiiro, lwaniliraanga abataali neende ababakayirira.

⁹Balomalomereenge, haandi heengaanga emisaango mu buluungifu, owabineenge abamanani neende abali mu budahano.

¹⁰Wiina mweene onyala ohunyoola omuhaaye oyera? Omuhaaye ofwaana atyo w'engaanga muno ohuhira amakina k'engaanga.

¹¹Wamwe amweesika, haandi achia ohunyoola amagoba maangi.

¹²Omuhasi oyo, mu bulamu bwae bwoosi, ayira wamwe bulai haandi samuleetera obudinyu bwoosi daawe.

¹³Akoonya obwooya bw'amakoondi neende epaamba, mani yaasona engubo naali neende esangaalo.

¹⁴Ali koti emeeri ch'abachurusi, ebyohulya byae abitusa eyale muno.

¹⁵Asimuha echuli muno obwiire nibusisiiri ohuhya mani n'atekehera abomu ngo wae ebyohulya haandi yeekesa abahalaabani bae bahasi esy'ohuhola.

¹⁶Abona abuundu wohumenya mani yaakulao; mani yehoonyera eseende chae yataakamo emisabbiibbu.

¹⁷Ahola emirimo neende esinani niyehoonyera amahono kae.

¹⁸Anyoola engaanga mu buli siindu sy'ahola. Ahola emirimo kata esiro, mani etaara lyae haba sirisima daawe.

¹⁹Omweene yeeruhira obuwuusi bwae, mani yasona engubo chae neende amahono.

²⁰Akwiira abamanani esisa mani yakabulira, haandi ahoonya abali mu budahano.

²¹Kata emboo yibeeho, haba saatya, olwohuba abomu daala lyae abafwaasa engubo ndai.

²²Omweene yesonera amasuuka k'ohwaala hu buliri; haandi yefwaala engubo chinyirira muno.

²³Wamwe amanyihaane bulai muno, niyehaale alala neende abahuluundu bomu siko baasye.

²⁴Omuhasi oyo asona engubo mani yaachikusa; asona neende esiroonyo mani yachikusa abachurusi.

²⁵Engubo chae nyomu haandi ch'oluyaali, haandi haba saatya ebichia ohukwaao.

²⁶Alomaloma eby'amakesi, haandi akeraka neende esisa.

²⁷Aliinda bulai abomu daala lyae, haandi saahola emirimo neende okusinye.

²⁸Abaana bae beema mani baboola bati, ng'ina yeefwe w'ehabi; kata wamwe yesi amukinia n'aboola ati:

²⁹“Abahasi baangi balai nibo, nae niiwe obahiramo boosi.”

³⁰Esiiso sibachirisa, haandi ohuboneha bulai hukotao, nae omuhasi wiisa oluyaali mu Omwaami afumiswa.

³¹Oyo muberese ebiindu byaahalaabaniire, haandi leha abaandu boosi bamuberese oluyaali.