Read saamia Engaado 8 Bible Online

Engaado 8 - saamia bible

Engaado 8

¹Amakesi alaanga, haandi ohumanya huhuumula.

²Hu bigulu biri aambi neende engira, yeema mu masang'aangira k'engira.

³Kahuumulira mu biruwa biingira mu siko, aambi neende emilyaango nikaboola kati.

⁴“Eyiri eng'we, eng'we abaandu, huumula, haandi amaliro kaange kachiire buli musaacha yeesi.

⁵Eng'we abataamanyihaane, mweeke ohwehaliirisa; Eng'we abasiru, mutekeerese.

⁶Tekeerese, olwohuba njia ohulomaloma emboosi ndai muno, haandi bi mbaboolera byoosi byadyeeri nibyo.

⁷Olwohuba nomanoma ebyadyeeri byoong'ene; ebibi by'omusiro mu munwa kwaange.

⁸Nomanoma ebiluungifu byoong'ene; sibulao esiindu sihyamu oba esikaluuhanakaluuhana.

⁹Byoosi bikololofu eyiri oyo owulira haandi byadyeeri eyiri oyo onyoola ohumanya.

¹⁰Daheenge engeraka yaange ohuhiraho efeesa, haandi ohumanya ohuhiraho esaabbu ndai;

¹¹olwohuba Makesi ahirira elalira amakina k'engaanga, haandi sibulao esiindu si wekoomba sy'onyala ohukeraania hu makesi.

¹²Ese niise Makesi, menya mu hwehaliirisa, haandi ndi neende ohumanya neende ohuheenga emisaango bulai.

¹³Ohutya Omwaami nihwo ohusyuula ebibi. Haba siindaha ohwehuduumbasa neende ohwepaaha neende esaambo mbi neende enomanoma y'obubacha.

¹⁴Ngeraka bulai haandi ndi amakesi kaadyeeri, manyirisa haandi neende amaani.

¹⁵Hoonya abatuki ohutuka, neende abatuka ohutaao amalako malai.

¹⁶Niise ohoonya buli mutuki hu syaalo ohutuka, neende abahunuufu ohutuka esyaalo.

¹⁷Abaandaha syesi nibo ba ndaha, haandi abo abaangoonya neende esinani nibo abaanyoola.

¹⁸Ndi neende obuyiinda alala neende oluyaali, obuyiinda buyiindira neende ohuhula-hulana.

¹⁹Ebiindu bi mbaberesa bihirira elalira esaabbu, kata esaabbu ndai yeene, haandi bihira efeesa yihiramo obulai.

²⁰Ngeendera mu ngira y'obuluungifu, mu mihoosi ky'obwadyeeri.

²¹Abaandaha mbaberesa obuyiinda, mani ndeechusa engaanga mu madaala kaabwe.

²²Omwaami n'aloonga, yachaaka naange, ndi omulimo kwae muhale haandi okutaangira.

²³Ndaliwo ohutula mu myaaka kya hale, ohutula mu njaako, esyaalo nisitaloongwa.

²⁴Ndeecha enyaanja niyisisiiri ohubaao, esulo nichisisiiri ohusooha amaachi.

²⁵Engulu chali nichisisiiri ohwombahwa, haandi ndataangirira ebigulu ohubaao.

²⁶Nasaae n'asisiiri ohuloonga esyaalo neende endalo chaasyo, oba olufu lwataangira hu syaalo.

²⁷Nasaae niyali n'ataao ekulu, ndaliwo, haandi ndaliwo niyali n'ataao okunyaanja,

²⁸niyabaamba ebireesi aakulu, niyataao esulo chiri aasi mu nyaanja,

²⁹yalagira enyaanja, efwiinda chibe neende yi chaakama, mani amaachi kahaye ohubita yi yalagira, niyataao emisiingi ky'esyaalo,

³⁰ndali aambi nae, koti omwaana wae muyere mani buli ludaalo ndali esangaalo lyae, nindehoyera mu moni wae buli siha,

³¹nisangaalira mu syaalo syae neende ebisirimo haandi nindehoyera ohuba alala neende abaandu.

³²“Mani bulaanu baana baange, muwulire bi mboola, olwohuba muli neende ehabi abo abadiira bi mbakerakira.

³³Muwulireenge bi babakerakira mani mube abakesi, haandi mutabirekeresaanga.

³⁴W'ehabi oyo owulira bi mboola, oba buli siha hu biruwa byaange, n'aliindira hu milyaango ky'enyuumba yaange.

³⁵Olwohuba buli onyoola aba anyoolere obulamu haandi Omwaami achia ohumudaha.

³⁶Nae oyo otanyoola, omweene yeewumisa; abo boosi abasyuula, baba badaha ohufwa.