Read saamia Engaado 9 Bible Online

Engaado 9 - saamia bible

Engaado 9

¹Makesi yoombaahe enyuumba yae, mani yayitaamo esiiro chitaanu-na-chibiri.

²Yeetere ebisolo byae, asaasire efiini yae, mani atekeehe esidyaalo.

³Atumire abahalaabani bae bahaana ohuchia abuundu ahiramo obuhunuufu bwomu siko ohulaanga nibaboola bati,

⁴“Oyo yeesi obula obumanyirifu, leha yeengire muno!” Oyo otali neende amakesi, kamuboolere kati,

⁵“Yiicha olye hu mugaati kwaange haandi ong'we hu fiini yi saasire.

⁶Tula hu baandu bataali neende amakesi, mani oyiindire, haandi okeendere alala neende abaandu bamanyirifu.”

⁷Oyo okerakira omuundu wepaaha, omweene yeeretera amanyeko, haandi oyo owoolobya omuhola-mbi, omweene yechuunia.

⁸Otoolobyaanga omuundu wepaaha, hu ahaye ohuhusyuula; yolobya omuundu mukesi, mani achia ohuhudaha.

⁹Kerakiraanga omuundu mukesi, mani achia ohwemeeda ohuba omukesi; yekesa omuundu muluungifu mani achia ohwemeeda ohweeka.

¹⁰Mu hutya Omwaami nimwo mu makesi kachaakira, haandi ohumanya Omwoolerefu Mweene, nihwo ohuba neende obumanyirifu.

¹¹Ohuba neende Makesi humeeda hu buungi bw'endaalo chao, haandi obulamu bwao buchia ohwemeeda mu myaaka.

¹²Nooba omukesi, niiwe omweene onyoola engaanga; nae n'ohaya, omweene niiwe owechuunia.

¹³Omuhasi musiru wesiyoka niye; abula amakesi, haandi abulamo esoni.

¹⁴Yeehala hu mulyaango kw'enyuumba yae, haandi anyoola obwiihalo abuundu ahunuufu byomu siko,

¹⁵ahuumula n'alaanga ababita, nibachia mu ngeendo chaabwe n'aboola ati,

¹⁶“Buli otali neende obumanyirifu, leha yeeche ano!” Haandi n'aboolera oyo otaamanyire ati,

¹⁷“Amaachi k'obwiibi, kanyunyuula n'okang'wa, haandi omugaati kuliirwa mu bweekisi, nikwo okusangaasa.”

¹⁸Nae haba saamanyire ati omwo nimwo mu bafu bali, ati abakeni bae bali emakoombe.