Read saamia Omuyaali 12 Bible Online

Omuyaali 12 - saamia bible

Omuyaali 12

¹Mani yichuliseenge Omuloongi wao n'osisiiri omuraaga, endaalo ndinyu nikisisiiri ohwoola, neende emyaaka nichisisiiri ohwoola ky'olibooleramo oti, “Haba sisiisyehoyera obulamu.”

²Ebiha ebyo nibyahoole, ao wahabone oti elyuuba, n'obulafu, n'omwoosi, neende eng'ining'ini, byeholere esiirima haandi ebireesi-reesi bikobooleo efula niyamalire ohukwa.

³Ao mani amahono kao akabeere nikahuwaabina kahahinaakirihe, haandi amakulu kao akalimo amaani bulaanu, kaheebokoye. Ameeno kao kahabboongohe mani kadoong'amo amadiidi, haandi nikatanyala ohunyaanya ebyohulya. Emoni chao chahabe nichibona amabulyeesi.

⁴Amatwi kao kahabe nikatanyala ohuwulira abo abayokerera hu ngira, kata neende ohuwulira olukina nilusya, oba amakono k'abaandu nibeemba, nae eyoni lyeemba lyahahusiingise mu ndoolo. Mani enyembo ndai choosi chahabe nichiduduuye.

⁵Ao mani olichaaka ohutya ohuniina ebiniino, haandi byahahudinyire ohukeenda. Omutwe kwao kwahabe nikwiichuulemo embuchi, haandi wahawulireenge oti amakulu kao kahusidoyeere ohukiinga, mani wehwehweesa-bwehwehweesa. Wahabe n'otaali neende esiindu si wekoomba ohulya. Ao mani omuundu naachia mu siwuluuhiro syae esy'endaalo choosi pe, haandi engira nichileeta abalisi.

⁶Omukoye kw'efeesa kwahabe nikuhaliihe, oba etaara ly'esaabbu lyahabe nilikwiire aasi mani nilyadiihe. Haandi omukoye kuhweesa amaachi mu sisima kwahabe nikuhaliihe, haandi esyoongo niyaadihe-yadiihemo.

⁷Ao omubiri kwahakobole mu loba mukwatula, nae omwooyo nikukobola eyiri Nasaae owakutuberesa.

⁸Omweekesa aboola ati, byoosi bihaya byeene.

⁹Omweekesa yali omuundu w'amakesi, haandi yemeeda ohweekesa abaandu ebyo bi yali n'amanyire. Yatekeeresaanga mani n'awulira nibakaada engaado, n'achehaliirisa bulai muno, n'atereesa engaado nyiingi muno.

¹⁰Omweekesa yateemaho muno ohwandiika emboosi chisangaasa, haandi mu buluungifu, yandiika emboosi chadyeeri.

¹¹Emboosi ch'omuundu mukesi chiri koti endawusi njoki yi mwaayi yehoonyera ohwirusira ebyaayo byae. Emboosi echo, omwaayi ochikaba ali mulala, haandi nichibuuswa alala, chiri koti emisumaari chihomerwe bulai.

¹²Mwaana waange, siluwo esiindu siindi sy'oli neende ohwehaliirisa bulai. Ohwandiika ebitabo haba sihuwa daawe, haandi ohusoma hubitiirifu hujoongi'a omubiri.

¹³Emboosi chaange chakaame ao, haandi choosi chiwuliirwe. Wisaanga mu Nasaae oluyaali, haandi oliindaanga amalako kae. Olwohuba sino nisyo si buli muundu ahoyere ohuhola.

¹⁴Olwohuba Nasaae yahaheengere buli muundu omusaango kwa buli siindu si huhola, omuli buli siindu siholwa mu bweekisi, kata sibe esilai oba esibi.