Read saamia Omuyaali 2 Bible Online

Omuyaali 2 - saamia bible

Omuyaali 2

¹Ndaboola mu mwooyo kwaange endi, “Mani bulaanu handeemeho ebisangaasa, omweene ndesangaase.” Nae bone, sino syosi syali ebihaya byeene.

²Ndaboola endi ohuba ao niwecheheresa, “Lino lalu haya,” nae ohwesangaase endi, “Silai siina sy'onyoolamo?”

³Ndakoonya mu mwooyo kwaange engeri yohusangaasa omubiri, ndabaasa hu hwesangaasa ning'wa amalwa, malireho ebiha byaange, nimbaasa endi awuundi esyo nisyo si abaandu bahoyere ohuhola endaalo choosi ech'obulamu bwaabwe hu syaalo.

⁴Ndahola emirimo ky'amaani: Ndeeyombahira enyuumba nyiingi haandi ndetaakira endalo ch'emisabbiibbu.

⁵Ndalimira endalo neende emikuunda, mani ndataakamo mwoosi emisaala ky'ebyaamo bya buli ngeri.

⁶Ndayaba ebidiba by'amaachi ohuchuhiirira esichaha sy'emisaala kihula.

⁷Ndakula abawaambe, abasaacha neende abahasi, haandi ndali neende abawaambe abeebulirwa mu ndala lyaange. Haandi ndali neende eng'oombe neende ebyaayo biingi ohuhira abaandu boosi abataangira ohuba mu Yerusalemu.

⁸Haandi ndebuusira efeesa neende esaabbu neende eby'obuyiinda by'abatuki neende eby'obwaami bu ndali nituka. Baliwo abasaacha neende abahasi abali neende omulimo kw'ohunyembera enyembo, haandi neende abahasi baangi muno abanyala ohusangaasa omusaacha.

⁹Mani ndali omuundu w'oluyaali luungi muno ohuhira abo boosi abataangira ohuba mu Yerusalemu, haandi ndadoong'a ni ndi omukesi.

¹⁰Haandi buli siindu si ndekombaanga, ndasinyoolaanga. Haba sindefwiirisaho esy'esangaalo kata silala mu bulamu bwaange. Buli siindu si ndaholaanga syandateraanga esangaalo, mani kuno nikwo okwali omukabo kwaange hulw'ebiindu byoosi bi ndahola.

¹¹Ebyo ndabaasa hu biindu byoosi bi ndali niholere neende ohudidiihana hu ndadidiihanamo hwoosi, mani nimbona endi byoosi byali ebihaya byeene. Byali koti ohwiirusa omuyaka okudiire. Haandu mbona endi hu syaalo huno, hubulaho kata esiindu silala esirimo obuhoonyi.

¹²Ebyo nibiweere, ndakeranisya amakesi neende elalu n'obusiru, olwohuba sibulao esiindu siyaaha si mutuki anyala ohuhola esitaholwa hale neende abatuki bamutaangira.

¹³Ao mani nimbona endi amakesi malai ohuhira obusiru, koti lu bulafu buli obulai ohuhira esiirima.

¹⁴Omuundu mukesi abona yali ohuchia, nae omusiru akeendera mu siirima. Nae haandi manyire endi enjakamo yaabwe boombi yiri nasilala.

¹⁵Ao mani nimbaasa mu mwooyo kwaange endi, “Esyahakwe hu musiro, syesi syahangeeho. Mani lwasiina ese mbeere omukesi muno?” Mani nimboola mu mwooyo kwaange endi, ebyo byoosi bihaya byeene.

¹⁶Olwohuba omukesi haba siyeechuliswa, nasilala koti omusiru atechuliswa endaalo choosi pe. Olwohuba ebiindu biriwo bulaanu buti, byoosi byaheebirirwe mu biha bichia ohwiichia. Haandi buli muundu wohufwa, kata abe omukesi oba omusiru.

¹⁷Mani esyo syakera ndaasyuula obulamu, olwohuba ndasinyiha buli siindu siholehana hu syaalo. Byoosi bibulamo obuhoonyi, biri koti ohwiirusa omuyaka okudiire.

¹⁸Ao mani nisyuula buli siindu si ndali niholere hu syaalo, nimbona endi ndi owohubirehera oyo owahabeeo ese nindulireo.

¹⁹Nae wiina mweene omanyire oba omuundu oyo yahabe omukesi oba omusiru? Nae mubwadyeeri bweene, oyo niye owahabe neende obunyala hu biindu bi ndadidiihanira nindehoonyera amakesi kaange hu syaalo. Mani sino syosi bihaya byeene.

²⁰Mani sino syamalamo omwooyo, ndeteeba endi, “Ndanyahanira siina endyo hu syaalo?”

²¹Olwohuba omuundu anyala ohuhola emirimo neende amakesi n'obuchweenufu haandi neende obwehaliirifu, nae mani byoosi bi aholere yabirehera omuundu wuundi otabihalaabaniraho kata nabudiidi. Sino syoosi bihaya byeene, haandi sibi muno.

²²Mani buhoonyi siina bu muundu anyoola muhudidiihana hwae, neende mu huhalaabana hw'ahalaabaniramo mu syaalo?

²³Olwohuba ebiha by'obulamu bwae byoosi abimalira mubuchuuni buhaya, haandi niyeyendehereere awula ohuwuluuha esideete neende esiro. Sino syosi bihaya byeene.

²⁴Sibulao esiindu silai mu bulamu bw'omuundu, esihira ohulya, ohung'wa neende ohwesangaasira mu biindu bi adidiihaniire. Esyo syosi ndabona endi ohunyala ohusihola, yiba ehabi yi Nasaae aberesa abaandu.

²⁵Olwohuba yi Nasaae ataali, wiina mweene onyala ohulya haandi yesangaasa?

²⁶Olwohuba Nasaae aberesa amakesi, ohumanya neende esangaalo eyiri omuundu omusangaasa. Nae eyiri omuhola-mbi, Nasaae amuberesa omulimo kw'ohubuusa neende ohubungiha obuyiinda, amale abiberese abo abamusangaasa. Sino syoosi bihaya byeene, siri koti ohwiirusa omuyaka okudiire.