Read saamia Omuyaali 4 Bible Online

Omuyaali 4 - saamia bible

Omuyaali 4

¹Ao haandi nimbona obutali bwadyeeri obuli mu syaalo. Mani bone, amasika k'abaandu babafwiinyirira, nae abulao omuundu yeesi obalemya omwooyo. Haba sibanyoola obahoonya, olwohuba abo ababafwiinyirira nibo abali mu bunyala.

²Esyo syakera nimbaasa endi, abafu baafwa hale, baliho bilai ohuhira abo abasisiiri abalamu.

³Nae ohiriramo elalira obulai niye oyo osisiiri ohwiibulwa, osisiiri ohubona esibi siholebwa hu syaalo.

⁴Mani nimbaasa esikera abaandu nibahola emirimo amaani. Bahola batyo olwohuba beekoomba ohuba neende ebilai biri koti ebya basyaabwe. Sino syosi bihaya byeene, siri koti ohwiirusa omuyaka okudiire.

⁵Omusiru abuumba amahono kae, mani omweene niyeyita enjala.

⁶Silai ohunyoola esyaaba silala nooli neende omuleembe, ohuhira ohunyoola ebyaaba bibiri n'osaandire haandi nooli koti owiirusa omuyaka okudiire.

⁷Haandi nimbona ebihaya byeene hu syaalo:

⁸Aliwo omuundu oli yeeng'ene, otali neende omwaana oba mwanaang'ina, nae adidiihana ataali ohuwuuluhaho daawe, haandi haba siyetuka obuyiinda bwali nabo, mani ahaye ohweteebaho ati, “Mani halaabaniraanga wiina endyo mani ndahaya ohuba neende esangaalo?” Sino syosi bihaya byeene, haandi hwechuunia bwechuunia.

⁹Abaandu babiri bahira omuundu mulala, olwohuba nibaholera alala, ao baba bahoonyana.

¹⁰Olwohuba mulala naakwa aasi, owaasye amuhoonya yamusiingisa. Nae omuundu n'aba yeeng'ene, mani yaakwa aasi, chiba chimwakaanire, olwohuba abulao onyala ohumuhoonya yamusiingisa.

¹¹Mu biha by'emboo, abaandu babiri nibeyalisa alala mu buliri, banyoola obubafu, nae omuundu mulala yeeng'ene, anyala atye ohunyoola obubafu.

¹²Abaandu babiri banyala ohulwaania omusuku owahayiingiire omuundu mulala naaba n'alwaanire nae, haandi omukoye kuluhirwe neende ebifuundiho bidatu, haba simwaangu kwohuhiriha daawe.

¹³Omuraaga mumanani haandi omukesi, ahira omutuki mukofu haandi omusiru otadaha ohukerakirwa.

¹⁴Omuundu anyala ohwiibulwa naali omumanani oba yatula mu jeela, mani yeehola omutuki.

¹⁵Ndabona abaandu boosi abali hu syaalo, alala neende omuraaga wuundi owakobola mu makulu k'omutuki.

¹⁶Omutuki anyala ohuba neende abaandu baangi baatuka, nae n'akwiisa omwooyo, abulao omuundu wichulira ebilai bi yahola. Mubwadyeeri bweene, sino syosi bihaya byeene haandi siri koti ohwiirusa omuyaka okudiire.