Read saamia Omuyaali 5 Bible Online

Omuyaali 5 - saamia bible

Omuyaali 5

¹Wehaliseenge bulai niwingiire mu Nyuumba ya Nasaae. Ohusuda aambi mani waatekeeresa, silai ohuhira ohuyaana esiyaanwa koti abataamanyire ebiindu bi bahola. Olwohuba haba sibamanyire bati esiindu sibali ohuhola sibi.

²Basaanga mberi hw'omale olomalome, haandi oteyangulisaanga ohwetolomania mu moni wa Nasaae, olwohuba Nasaae ali muukulu, nae ewe oli hu syaalo. Mani sakira leha emboosi chao chibecheenge endiidi.

³Olwohuba ebiindu bi muundu adidiihaniramo, ebyo nibyo ebiba ebilooto byae, haandi omusiru amanyihanira mu mboosi nyiingi ch'alomaloma.

⁴Niweeyama eyiri Nasaae ohuhola esiindu, wanguyaanga ohusyoseresa, olwohuba Nasaae haba saasangaalira abasiru. Yoseresaanga esyo si weeyama ohuhola.

⁵Silai ohaye ohweeyama, ohuhira ohweeyama noohaya ohwooseresa esiindu si weeyama.

⁶Otafukiiriraanga emboosi chao cheene ohuhukwiisa mu syonoono, haandi otabooleraanga wamwaanda wa Nasaae oti walomaloma byotaamanyire. Lwasiina olomaloma ebinanyoolese Nasaae, mani yasihirisa ebiindu bi wadidiihanira?

⁷Olwohuba ohubaasa huungi huli koti esilooto, esyo nisyo esikera omuundu yalomaloma ebitaalimo ohutya Nasaae.

⁸N'obonaanga abamanani nibafwiinyirirwa, haandi nibatabaholera obwadyeeri neende obaberesa ebyo bi bahoyere ohunyoola, otesinduhaanga daawe, olwohuba omuhunuufu aliindwa neende oyo omuhiraho obuhunuufu, haandi oyo omuhiraho yesi ali neende omuhunuufu omuhira oluyaali.

⁹Nae ohuyirira alala, eloba lihoonya buli muundu, haandi omutuki yesi alya ebitula mu ndalo.

¹⁰Omuundu owaheera muno eseende haba salinyoola eseende chimumala daawe, noomba oyo odaha muno obuyiinda, neende engaanga yabwo, haba siyahanyoole buli siindu sy'adaha daawe. Sino syosi bihaya byeene.

¹¹Ebiindu nibyemeeda ohwiingiya, abo ababilya bosi bemeeda ohuba abaangi. Mani abeenebyo banyoolamo buhoonyi siina ohumalaho ohutaao sa emoni?

¹²Omuundu ohalaabana neende amahono kae, yeyalisa endoolo mani chamulyooyera, kata ayahaba n'atali neende ebyohulya bimumala daawe; nae omuyiinda akona n'ateyaliise haandi n'abaasa esiro syoosi.

¹³Siluwo esiindu sibi muno si bweene mu syaalo sino: Nibwo obuyiinda bubiihwa, omweene buyiinda obwo niyechuunia muno,

¹⁴mani obuyiinda obwo nibusihirira hulw'ebidinyu bitaamanyihaane; mani yeebulwa omwaana n'abulaho esiindu syoosi kata.

¹⁵Koti lu yatula mu nda ya ng'ina naali bihaya, olwo lwosi nilwo lu yahatule mu syaalo koti lu yasiichamo. Sibulao esiindu sya anyala ohuyiraho hweebyo bi yadidiihanira.

¹⁶Mubwadyeeri bweene, sino sibi muno. Omuundu awaao amahono mahaya koti lu yeechia. Ngaango siina y'anyoola muhudidiihana hwae? Siri sa koti ohwiirusa omuyaka okudiire.

¹⁷Endaalo ch'obulamu bwae choosi, aba mu siirima haandi niyeyendeherera muno, aba omulwaae haandi niyanyoolera.

¹⁸Bone, esilai si ndabona, si muundu ohoyere ohuhola, nihwo ohulya, ohung'wa neende ohusangaalira mu biindu bi yadidiihanira mu bulamu bwae byoosi, bu Nasaae yamuberesa hu syaalo, olwohuba okwo nikwo omukabo kwae.

¹⁹Buli muundu yi Nasaae abereese obuyiinda neende ebiindu, mani yamunyalira ohubilyaaho, mani naafukiirira omukabo kwae, mani yasangaalira mu biindu bi adidiihaniire, sino siba esiyaanwa ohutula eyiri Nasaae.

²⁰Olwohuba omuundu oyo haba saachia ohubaasaanga hu ndaalo ch'obulamu bwae, olwohuba Nasaae amuliinda naali omusangaafu mu mwooyo kwae.