Read saamia Omuyaali 6 Bible Online

Omuyaali 6 - saamia bible

Omuyaali 6

¹Siluwo esiindu sibi muno si bweene hu syaalo, haandi esidinyira muno abaandu:

²Nisyo esy'omuundu yi Nasaae yaberesa obuyiinda, emyaandu, neende oluyaali, mani sibuleo esiindu syoosi si muundu oyo ataali nasyo, nae Nasaae n'atafukiirira omuundu oyo ohubisangaaliramo daawe, nae omuundu muteende wuundi niye obusangaaliramo. Sino syosi bihaya byeene, haandi sichuuna muno.

³Omuundu anyala ohwiibula abaana emia, haandi yayiindira emyaaka miingi hu syaalo. Nae kata yahayiindira atye, n'ataba n'anyoolere esangaalo mu bulamu bwae, haandi n'atasiihirwe mu ngeri yihoyera, ese mboola endi esituluucho siba simuhira.

⁴Bubulao obuhoonyi esituluucho ohwiibulwa. Olwohuba sibulwa nisiri mu siirima, haandi siwaao mu siirima.

⁵Kata ayahaba mbwe haba siyabonaho elyuuba oba yamanyaho esiindu syoosi daawe, aba awuluuhira.

⁶Ahiraho oyo owayiindira emyaaka elifu chibiri, nae haba siyasangaalira mu biindu bilai bi yali nabyo. Haandi esiindu siindi, omuundu oyo neende esituluucho, boombi bachia nasilala.

⁷Omuundu mu mirimo abuundu, ahalaabanira omunwa, nae obwekoombi bwae sibwiikuta daawe.

⁸Omuundu mukesi ahira omusiru siina syeene? Haandi omumanani, simuhoonya siina syeene ohuba omwegenderesa?

⁹Silai ohuta omwooyo hu siindu sy'obonaho, ohuhira ohulaluhanira esyo si wekoomba sa. Sino syoosi bihaya byeene, siri koti ohwiirusa omuyaka okudiire.

¹⁰Buli siindu siruo, syakulihwa hale eliita. Haandi engeri ya buli muundu yamanyihana. Omuundu haba saanyala ohuyiingania oyo omuhira amaani.

¹¹Ohuyiingania koti lu hwaaka, olwo lwosi nilwo lu bihaya byeene hwaaka. Ao mani omuundu anyoolamo buhoonyi siina?

¹²Olwohuba wiina omanyire esihoyera omuundu mu bulamu bwae bwiimbikiti obubulamo amahuluundu, haandi obuhamyuuha sa koti esiiniha? Haandi wiina onyala ohuboolera omuundu ebyahakweeo mu syaalo n'amalere ohusitulamo?