Read saamia Omuyaali 7 Bible Online

Omuyaali 7 - saamia bible

Omuyaali 7

¹Eliita lai lihira amafuta kawunya esing'aari; haandi oludaalo lu muundu afwiiraho lulai ohuhira lu yeebulirwaho. Silai ohuchia mu nyuumba yi baliriramo omufu,

²ohuhira ohuchia mu nyuumba yibakabuliramo esidyaalo. Olwohuba ohufwa nihwo enjakamo y'abaandu boosi, mani silai abaandu balamu ohusibaasaangaho.

³Ohuba neende esibeera silai ohuhira ohucheha, olwohuba ohusaanda hukera omuundu naamanya.

⁴Omuundu mukesi anyoola ebiha by'ohubaasa hu ngisa yae; nae omusiru amalira ebibaaso hu hwesangaasa.

⁵Silai omuundu mukesi ohuhwoolobya, ohuhira omuundu musiru ohuhukinia.

⁶Olwohuba koti lu hwi ch'amawa chitulihira mu muliro aasi w'enuungiro, olwo nilwo lu njeho ch'omusiru chiri; sino syosi, bihaya byeene.

⁷Mubwadyeeri bweene, ohufwiinyirira abaandu huhola omukesi yaaba omusiru, haandi ohulya asowa kyae kyoosi humala mu baandu ohutegeera.

⁸Enjakamo y'esiindu yihira enjaako yasyo, haandu ohugumira huhira ohweniinia.

⁹Otanguyaanga ohunyoolera, olwohuba etima limenya mu basiru.

¹⁰Otateebaanga oti: “Lwasiina endaalo hale chali endai ohuhira chino?” Esyo haba si siteebo sy'amakesi daawe.

¹¹Amakesi malai koti ohusihira esiindu, mani buli muundu mulamu yeesi ahoyera abe omukesi.

¹²Olwohuba ohuliinda amakesi siri koti lu seende yiliinda. Nae ohumanya huli neende obuhoonyi olwohuba amakesi kaliinda oyo oli nako.

¹³Baase hu biindu bi Nasaae yahola. Wiina onyala ohukolola esiindu si Nasaae yahola nisyekodere?

¹⁴Ebiindu nibichia bulai, sangaala; haandi nibichia bubi, manya oti Nasaae niye owataao ebyo byoombi, abaandu bahaye ohumanya bati bihoyere ohubaao.

¹⁵Bino byoosi mbiboneere mu bulamu bwaange obuli ebihaya byeene. Aliwo omuundu muluungifu ofwiira bwaangu mu buluungifu bwae, nae aluwo omuundu mubi oyiindira, kata ayahaba n'ahola ebibi.

¹⁶Mani sakira otabitirisaanga ohuba omuluungifu, oba omukesi. Lwasiina odaha ohweeyita omweene?

¹⁷Haandi otabitirisaanga ohuba omubi. Lwasiina omweene wesihiirisa ebiha nibisisiiri ohwoola?

¹⁸Silai wefukeenge mu ebyo byoombi, olwohuba oyo owiisa mu Nasaae oluyaali achia ohubyebwaaba byoosi.

¹⁹Amakesi kaberesa omuundu mukesi amaani ohuhira abatuki ehumi abali mu siko.

²⁰Mubwadyeeri bweene, abulao omuundu muluungifu hu syaalo owahahola sa ebilai byoong'ene, mani yaahaya ohuholaho ebibi daawe.

²¹Otatechaanga omwooyo hu buli siindu abaandu si baboola, ataali ao onyala ohuwulira omuhalaabani wao nahudyaabuhira;

²²olwohuba omanyire bulai bweene koti lu wesi wadyaabuhira abaandu baandi amahabi maangi muno.

²³Ebyo byoosi ndabiteema nindehoonyera amakesi kaange; mani nimboola endi, “Heengereo ohuba omukesi.” Nae amakesi kali eyale naange.

²⁴Buli siruwo, sihirira eyale amakesi keefwe. Haba sihunyala ohusimanyira elalira hwasimalayo daawe. Wiina onyala ohusiteeberesa yasimalisirayo elalira?

²⁵Ndamalira ebibaaso byaange hu humanya, neende hu hukoonyeresa, neende hu humanya amakesi, neende ohumanya koti lu biindu lu biri, haandi neende ohumanya endi ohuba omubi esyo sy'abaandu basiru, haandi koti obusiru buli elalu.

²⁶Haandi ndabona esiindu sihahaata ohuhira oluumbe lwiita, niye omuhasi oli koti omuteego oba olweero. Amahono kae nikahuwambaania kahuboya koti olunyoloro. Oyo ohola ebiindu bi Nasaae asangaalira niye owahawone, nae omuhola-mbi achia ohuwaambwa neende omuhasi oyo.

²⁷Omweekesa aboola ati, “Bone, sino nisyo sindoolaho nihubaachakania ebibaaso, ohumanya esyadyeeri.”

²⁸Esyo nisyo si ndadaha ohumanya, nae nisihaya ohunyoola. Mu baandu elifu, ndanyoola omusaacha mulala ohoyera, nae mu abo boosi, haba sindabonamo omuhasi kata mulala daawe.

²⁹Bone, sino syoong'ene nisyo si ndanyoola. Nasaae yaloonga abaandu nibali abaluungifu, nae abo abeene nibekoonyera obudoondobanu buungi.