Read saamia Omuyaali 9 Bible Online

Omuyaali 9 - saamia bible

Omuyaali 9

¹Nae bino byoosi ndabibaasaho mu mwooyo, mani ndabyehaliirisa byoosi, nimbona endi abaandu baluungifu neende abakesi neende ebiholwa byaabwe biri mu bunyala bwa Nasaae, kata hwaahaba obuheeri bwaabwe oba ehiinda yaabwe. Buli siindu siri mu moni bihaya byeene.

²Ebikwa hu baandu boosi biri nasilala ataali ohukwiira kata nabudiidi; bikwa hu baandu baluungifu neende abahola-mbi, abala neende ababi, abadeeba hu hweefunaka ebyonoono byaabwe neende abo abatadeebayo ohwefunaka ebyonoono byaabwe, abo abayaana ebiyaanwa neende abo abatayaana ebiyaanwa daawe. Omuundu mulai neende omuhola-mbi, owechuba n'ahubba esyeyamo neende oyo oteyama, boosi baba nasilala.

³Sino nisyo esibi siri mu buli siindu syeholeha hu syaalo, ohuba mbwe esiindu nasilala esikwa hu baandu boosi mu ngeri nasilala. Haandi emyooyo ky'abaandu balamu boosi kyeechulamo ebyonoono neende elalu, mani esiloondaho nihwo ohufwa.

⁴Nae oyo osisiiri omulamu aba neende esuubi, koti lu bakaada bati, embwa namu yihira edalang'i yifwiire.

⁵Olwohuba abaandu balamu bamanyire bati bachia ohufwa, nae abafu sibulao esiindu si bamanyire. Babula neende omukabo kwoosi, olwohuba abulao obeechulisa.

⁶Ohudaha hwaabwe, neende ohutadaha hwaabwe, neende ohwekoomba hwaabwe, bibi nibitaliwo daawe, haandi baba nibaakama ohukabana mu biindu byoosi bi bahola hu syaalo.

⁷Chia mani olye ebyohulya byao neende esangaalo, haandi ong'we amalwa kao niweehoya; olwohuba Nasaae amalire ohusiima ebiindu by'ohola.

⁸Leha engubo chao chibecheenge endafu buli ludaalo, haandi webaheenge amafuta mu bweeni mani onyirire.

⁹Sangalaanga neende omuhasi y'odaha endaalo ch'obulamu bwao obuli ebihaya byeene, bu Nasaae ahubereese hu syaalo, olwohuba okwo nikwo omukabo kwao mu bulamu bwao neende muhudidiihana hwao hwodidiihaniramo hu syaalo.

¹⁰Buli siindu sy'ohola, sihola neende amaani kao koosi; olwohuba emakoombe yoochia, abulao ohuhola, oba ohubaasa, abulao ohumanya oba amakesi.

¹¹Haandi ndeehaliirisa mani ndabona endi hu syaalo huno, abeeruha muno embiro haba sinibo abahiraangamo hukerana, noomba ab'amaani haba sinibo abayiingiraanga ebiita, noomba ab'amakesi haba sinibo abanyolaanga eby'obuyiinda, haandi abachweenufu haba sinibo abanyolaanga emirimo ch'aakulu. Nae ehabi neende ebiha, boosi bibakwaaho-bukwa.

¹²Olwohuba omuundu haba samanyire esiha yi syahoolere. Koti lu ng'eeni chiwaambya mu lweero, oba amayoni kawaambya mu luhaanda, olwo nilwo lu baandu bawaambya mu biha bibi nibatamanyire.

¹³Haandi esyohuboneraho sino ndasinyoola hu syaalo, esidiira hu makesi, mani nimbona endi sihuluundu nisyo.

¹⁴Waliwo esiko sidiidi, haandi abaandu bomu siko esyo bali abadiidi, mani omutuki w'amaani n'asiseeta. Mani naasyebodoohania, naatekeha ebinaalikule esida sy'esiko esyo.

¹⁵Mu siko esyo, mwalimo omusaacha mumanani, nae oli neende amakesi. Mani niyehoonyera amakesi kae nawonia esiko esyo. Nae esiwukisa muno, abulao omuundu wahechulise omusaacha mumanani oyo.

¹⁶Mani nimboola endi kata ayahaba mbwe amakesi kahoonya ohuhira amaani, nae amakesi k'omuundu mumanani kalekeereswa, haandi abulao otekeeresa emboosi chae.

¹⁷Emboosi chi omuundu mukesi alomaloma chiwulirwa ohuhira ech'omutuki w'abasiru ayokera.

¹⁸Mu biita, amakesi kahoonya ohuhira ebilwaaniso, nae omuundu mubi mulala yoong'ene ati, asihirisa ebilai biingi muno.