Read saamia Olweembo Luhira mu Nyembo 1 Bible Online

Olweembo Luhira mu Nyembo 1 - saamia bible

Olweembo Luhira mu Nyembo 1

¹Olweembo luhiramo obulai mu nyembo chia Solomooni choosi.

²Eminwa kyao kiiswaniisye ohuunjunjuuna; obudya bwao buhiraho efiini.

³Ewe weechulaho esing'aari; eliita lyao lyosi lyomiisa lityo. Abulao omuhasi onyala ohwekaya ohuhwekoomba.

⁴Mbukule wuunjire, mani hwiiruhe huweeo; ba omwaami waange mani wuunjire mu siseenge syao. Huchia ohusaangaala fweembi, hung'wechane mukati bweene, mani hukotere mu budya. Sakira abahasi boosi bahweekombaanga!

⁵Eng'we abahasi ba Yerusalemu, ese ndi omumali nae ndi ow'esiiso, titititi koti amayeema komu siparara sya Kedari, nae ow'esiiso koti obusaate bwomu dooho lya Solomooni.

⁶Mutaandekeresa ohweema hu fwaani yaange, olwohuba elyuuba nilyo elyaangaluuhania sa. Bamboocho yaange nibo abanyoolerera baakera ndahalaabanaanga mu mukuunda kw'ebyaamo. Ndaahaywa ohunyoola ebiha by'ohweenyirisa.

⁷Ewe mboolereho, mudya waange, Onaayire yeena ebyaayo byao ohwaaya? Onaabyeyikamie yeena bweene ohweekisa omubasu kwaaduha esideete akati? Siina syeene esikera ndaahukoonyaanga endi mu byaayo by'abaandu baandi?

⁸Ewe haba somanyireho abuundu ao daawe, ewe halai obahiramo boosi? Ewe chia oloonde hu byaayo ebyo; onyoolere embusi chao omuboka aambi neende amayeema k'abaayi.

⁹Ewe, mudya waange, osaangulusa abasaacha koti lu efaraasi ehaana yisaangulusaanga esaacha chihweesa ebigaari bya omutuki wa Misiri.

¹⁰Efwiiri lyao nyirifu koti lu liihirira hu matama kao haandi lyereera hu kosi lyao koti ebyuuma.

¹¹Nae efwe huchia ohuhuluhira olunyolo lw'esaabbu alala neende ebbaangili chiindi ech'efeesa.

¹²Omutuki waange yali niyeyaliise hu sitaanda syae, nae amafuta kaange keechusa emboo yoosi neende esing'aari.

¹³Omudya waange ali neende esing'aari sya miira ni yangonere hu mbeere chaange.

¹⁴Omudya waange wuno ali koti ebimuli byomu siino ebimulihiraanga mu mikuunda ky'ebyaamo kya Engedi.

¹⁵Oli ow'esiiso muno, omudya waange; emoni chao chileenya obudya!

¹⁶Oli ow'esiiso, ewe omuheerwa waange; nga wusaangaasa! Enyaasi lya nabunyaasi nilyo elichia ohuba obuliri bweefwe;

¹⁷emiseengese nikyo ekichia ohuba emiguulo ky'enyuumba yeefwe, nae emikaratuusi kichia ohuwambaania esida neende esirama.