Read saamia Olweembo Luhira mu Nyembo 3 Bible Online

Olweembo Luhira mu Nyembo 3 - saamia bible

Olweembo Luhira mu Nyembo 3

¹Nindeeyalisa mu buliri bwaange, buli siro ndabaasaanga omudya waange; ndamukoonyaanga nae haba si ndanyalaanga ohumunyoola.

²Ndakeendanaangaho mu siko, niing'aalaala mu bbarabbara chasyo, neende amakira kasyo. Ningoonya omudya waange. Ndakoonya nae haba sindamwakaana daawe.

³Abaliindi baliindanga esiko esyo baambona. Ndabateeba endi, “Mumbweneereho omudya waange?”

⁴Nindabatulaho sa endi, ndamweduuyaho. Ndamwebbakiraho ndaahaya ohumulehuula yaanduleho ohwoola lu ndamuyira mu nyuumba ya mako yaange, mu siseenge bweene yi ndeebulirwa.

⁵Musuubise, eng'we abahasi bomu Yerusalemu; Mundechubire neende esijusu sy'embiro haandi neende emboongo cheene muti haba simuchia ohudoondobania obudya bweefwe buno.

⁶Siina syeene sino esiri ohutulira mu siparara nisiri koti olwoosi lu nioha, koti esing'aari sy'obubbaani neende miira, koti obubbaani bukuswa neende abachurusi?

⁷Solomooni nguyo yeecha n'akiingirwe hu sisaala syae sy'obwaami; abanamaye amahumi kasaasaba nibamuliindire, abanamaye bahiramo obumanyirifu mu Yisiraeli.

⁸Boosi bamanyirifu muno mu hulwaanira olugaanga; banamaye bajiing'u bamaliirifu. Buli otulayo akiingire olugaanga, niyeliindire ohuseetwa hw'esiro.

⁹Omutuki Solomooni mweene, akingiirwe hu sisaala sy'obwaami esyaholwa mu mbaao chihiramo obunyirifu.

¹⁰Emisiruunga kyasyo kyawomwaho efeesa; engubo yaalwaho yatuungirirwa neende esaabbu. Emito kyahwo kyanabirwaho engubo y'eraangi ya papo, eyaluhwa neende esiroonyo neende abahasi bomu Yerusalemu.

¹¹Abahasi ba Siyooni eng'we, mwiiche mweebonereho Omutuki Solomooni. Afwaalire ekofia y'obutuki yi ng'ina mweene yamuteengeha hu mutwe kwae oludaalo lw'obweya bwae, hu ludaalo lw'esangaalo neende omwehoyo.