Read saamia Olweembo Luhira mu Nyembo 4 Bible Online

Olweembo Luhira mu Nyembo 4 - saamia bible

Olweembo Luhira mu Nyembo 4

¹Nga oli ow'esiiso, omudya! Emoni chao nga chimesamesana n'obudya emukoongo w'esitambaya syoohumutwe. Efwiiri lyao lihinaakiriha hu mutwe kwao koti esidiiyiha sy'embusi nichiholomoha engulu cha Gileadi.

²Ameeno kao malafu koti epaamba chahadoolwa mani chooswa. Sikalimo kata embanya yoosi daawe; koosi kaakanirira sa.

³Eminwa kyao kiri koti ahasibiro haahanyu; nga kiseenderesa n'olomaloma. Amatama kao kamwemweendera sa mu sitaambaya si webwiihire.

⁴Ekosi lyao lyetengeha koti omunaara kwa Daudi, ly'ehuyungirisa mani lyaanyirira; neende esyuuma sifwaana koti engabo elifu ndala nichilideemberaho.

⁵Embeere chao ch'okiya koti ech'esijusu, ehulo cha namahwaana nichaaya mu bimuli.

⁶Ese njia ohumenya hu lugulu lwa miira, olugulu lw'obubbaani, ohwoolera elalira koti lu emboo y'echuli yichia ohuchaaka ohwuucha haandi esiirima ni sihamao

⁷Nga oli neende esiiso omudya; nga oli omulai mweene!

⁸Hahwiihirire fweembi nihutula hu ngulu cha Lebbanooni, omweeya; hutule fweembi mu Lebbanooni. Yiha otule aakulu woolugulu lwa Amana, ohutula hu Lugulu lwa Senili neende hu Lugulu lwa Hamoni, yi edalang'i neende eengwe byamenya.

⁹Emoka y'emoni chao, halai waange haandi omweeya, neende olunyolo lu wefwaalire Luhalaake omwooyo kwaange

¹⁰Obudya bwao busaangaasa, ewe omwooyo kwaange haandi omweya. Obudya bwao buhira efiini; amafuta kao kalimo esing'aari sihiraho esy'ebiluungo biindi.

¹¹Eminwa kyao kinyunyuula ohuhiraho obuuhi, omuheerwa; olulimi lwao yi ndi luli koti amabeere neende obuuhi. Ebyefwaalo byao birimo esing'aari syoosi esiri mu Lebbanooni.

¹²Omwooyo kwaange, omweya, ndalo yaange ya bweekisi, endalo yabodoohaniswa esida, esulo y'engiso;

¹³ebimera bikinaakina. Bibiriramo koti omukuunda kw'ebyaamo by'emituli mani kyaama ebyaamo binyirifu. Sohaya ohunyoolamo ebyaamo bihiramo obulai koti hena neende naridi,

¹⁴safurooni, kalamuusi, neende sinamooni, kata obubbaani bwa buli embya. Miira neende alobeera byosi bihulira omwo alala neende amafuta kahiramo esing'aari.

¹⁵Esulo nichio echichuhiirisaanga mu ndalo eyo, otwaalo tw'amaachi kahulukusa, emoni ch'esulo chifududusa nichiihirisa amaachi katula muungulu cha Lebbanooni.

¹⁶Simuha, buyaanja w'emukulu. Buyaanja w'emwaalo, wuuchirisa hu ndalo yaange; yichusa esing'aari mu mboo. Lehe omudya waange yeengire mu ndalo yae mani alye ebyaamo byayo bihiramo obulai.