Read saamia Olweembo Luhira mu Nyembo 5 Bible Online

Olweembo Luhira mu Nyembo 5 - saamia bible

Olweembo Luhira mu Nyembo 5

¹Ese malire ohwiingira mu ndalo yaange, omwooyo kwaange, esuunga yaange. Ese ndi ohwekesera ebiluungo byaange neende miira; ese ndi ohwehoombera obuuhi bwaange neende ohulya amabbaangara keene; ese ndi ohweng'weera efiini yaange neende amabeere. Eng'we abadya, mulye haandi mweng'weere sa ohwoola lu mwoola mwameera obudya!

²Nindali nindeyaliise, omwooyo kwaange nakwo kwali ni kumoka. Ndaloota omudya waange n'ahong'oonda hu lwiiki lwaange. Njikulireo nyingire, omukoosi waange, omwooyo kwaange, haandi eguugu lyaange. Omutwe kwaange kwaamire olume, mani efwiiri lyaange lidotere omunyiti.

³Malire ohwefwalulira elalira; hulwaasiina ndeefwaale engubo haandi? Malire ohweyosa amakulu; haandi ndahakobolamo endye ohukamaliya?

⁴Omudya waange yata omuhono kwae hu lwiiki, mani amabaanga kaanjiruha mu mubiri kwoosi ndaamanya endi hane yali yanjolereho.

⁵Syesi ndeetekeha ohumwaakaanira yeengire mukati. Amahono kaange kali nikeedubire miira, enjala chaange choosi nichibahabahaane neende miira y'amaachi, koti lu ndoola ohwebbakira hu sidiiri sy'olwiiki.

⁶Ndeekulira omudya waange olwiiki, nae hane yali n'amalire ohuhamyuuhao. Nga ndekoomba ohuwuliraho ekono lyae! Mani ndamukoonya, nae byaahayira elalira ohumunyoola; Ndamulaanga, nae sindawuliraho ohufukira hwae.

⁷Abaliindi bali nibaliinda esiko esyo baambona; mani baandoocha baanyubulula; abaliindi b'esida sy'esiko esyo baandaandulaho ekofia yaange.

⁸Musuubiseho, eng'we abahasi bomu Yerusalemu, muti nimuchia ohunyoola omudya waange oyo, muchia ohumuboolera muti obwekoombi buunjita.

⁹Abahasi bahiramo esiiso eng'we, mani omudya weeng'we yakabuhanaho neende abaandu baandi boosi? Siina syeene esiwukisa esimuliho esikera efwe hwahusuubisa?

¹⁰Omudya waange oyo w'esiiso haandi w'amaani; ali mulala yeeng'ene mu baandi elifu enaamba.

¹¹Obweeni bwae bufwaana mugasa haandi munyirifu; efwiiri lyae ly'amayeengo lyamaliyisa koti ebbiichu.

¹²Emoni chai ch'esibooi koti amaguugu akeyaanjire hu maachi kahulukusa, akeyoka mu mabeere, nikeemere mbwene.

¹³Amatama kae kasaambirisa koti endalo yadiiyihamo hamulali neende ebiluungo. Eminwa kyae kifwaana koti ebimuli ebidoonya sa miira y'amaachi.

¹⁴Amahono kae kamuchiiraho bulai bweene, mani yefwalaanga emigasa kiriho ebyuuma. Omubiri kwae kuterera koti ameeno k'enjofu manyirifu, okuliho amafuta ka safire.

¹⁵Amataango kae kali koti emisiiro ky'omutuumba kabeengisa mu nyiingo ch'esaabbu. Mukololofu koti Engulu cha Lebbanooni neende emituumba kyahuulihaho.

¹⁶Omunwa kwae kunyunyuula n'okuchunjuuna; buli si muliho syoosi si ndalusa. Yino niyo efwaani y'omudya waange oyo, eng'we abahasi bomu Yerusalemu.