Read saamia Olweembo Luhira mu Nyembo 6 Bible Online

Olweembo Luhira mu Nyembo 6 - saamia bible

Olweembo Luhira mu Nyembo 6

¹Eng'we abahasi bahiramo esiiso, omudya weeng'we nae yachiira yeena? Mutuboolereho, ngira siina yi mudya weeng'we yadiira, hu fweesi hweemeo hubahoonye ohumukoonya.

²Ngaandi omudya waange yechiriire mu ndalo yae, yi misaala milai kyameramo. Ali ohwaaya ebyaayo byae mu ndalo omwo haandi ali ohwenokera otumuli twae.

³Omudya waange, waange syeeng'ene, haandi ese ndi owae yeeng'ene; yayaanga ebyaayo byae mu bimuli muno.

⁴Omudya, oli neende esiiso koti Yerusalemu, omudahwa koti esiko sya Tirisa, owamakana koti ebiko bihuluundu bino bibiri.

⁵Muunduseho emoni cheeng'we; chiri ohuundiisa esoni. Efwiiri lyao liteengereha koti eyiicho ly'embusi nichiihirira ebigulu bya Gileadi.

⁶Ameeno kao kalaba koti epaamba chimalire ohudoolwa.

⁷Amatama kao kamwemweendera enyuma w'esitaambaya si webbwooyere.

⁸Leha omutuki abe neende abatuki mahasi bae amahumi kasaasaba, neende abahasi b'erwaanyi amahumi katanu-na-kadatu, kata abahaana bayere abatabaliha!

⁹Nae ese owaange mulala yaamala, haandi muheerwa koti eguugu. Niye abbong'o wa ng'ina, ohiramo mu baana ba ng'ina. Abahasi b'erwaanyi boosi abamubonaho bamufumia; kata abatuki bahasi neende banasikooko bosi beemba nibamufumia.

¹⁰Naanu mweene wuno aboneha koti obwiire buhya? Alimo esiiso haandi mukesikesi, ang'enang'ena koti elyuuba haandi koti omwoosi.

¹¹Ese mbano njakuuhe ohutula hu misaala ky'alimoondi ohubonaho ebimera bidoto bihulira mu hooho, ohubona amasaafu madoto nikali hu misabbiibbu; haandi neende ohumuliha hw'emisaala ky'ebyaamo.

¹²Ndeengereha; wunjekeese ohuhola obudya koti omwiirusi w'esigaari olwaana ebiita.

¹³Hina, hina, omuhaana wa Sulaamu. Leha huhwelolere nga wegaara. Siina syeene esikera ni wundewuunja koti lu hinira akatikaati w'enyiriri ch'abayoori?