Read saamia Olweembo Luhira mu Nyembo 7 Bible Online

Olweembo Luhira mu Nyembo 7 - saamia bible

Olweembo Luhira mu Nyembo 7

¹Ngooli omuhaana nasiboneha! Amakulu kao nga kalyooyera mu patupatu. Echendaango ch'amataango kao chiri koti echaloongerwaho neende omuloongi ohiramo obubalabalanu.

²Ebbakuli mbao yiruwo, eyitawechaangamo efiini enuunge. Esibukata sy'engaano syosi mbao siruwo, syebodohaanie ebimuli bilai.

³Embeere chao chiri koti ebijusu bya namahwaana, koti emboongo chibiri.

⁴Ekosi lyao liri koti omunaara kw'ameeno k'enjofu. Emoni chao koti ebidiba biri mu siko sya Hesibboni, ebiri aambi neende esiruwa sy'esiko sihunuufu. Elyoolu lyao lyekoombwa koti omunaara kwa Lebbanooni okweeteka nikuliindire Damasiko.

⁵Omutwe kwao kweeteka tiiri koti Olugulu lwa Karimeeli. Efwiiri lyao esuuke li milamilana koti elaasi yihiramo obunyirifu; obulai bwalyo bunyala kata bwaambya omutuki yeesi.

⁶Ngooli omunyirifu, ngoolimo esiiso; esangaalo ly'obudya bwao nga liichufu.

⁷Oli nabunyiri koti omusaala munaasi, haandi embeere chao nichio eminaasi kyaamaho.

⁸Ese njia ohweyaanayo ohuniina omunaasi okwo male noke ebyaamo byakwo ebyo. Eyiri ese, embeere chao chiri koti ebibubuli by'eminaasi, omuuya kwao kuli koti esing'aari sy'epeera,

⁹haandi muhanwa mwao muli koti efiini yihiramo obunyirifu. Mani leha efiini yihulukuse yoole hu mudya waange, yihulukuse hu minwa kyae neende hu meeno kae.

¹⁰Ese ndi hu mudya waange syeng'ene, haandi yesi yandekoomba.

¹¹Yicha, omukoosi waange, leha hutule hwechiire erwaanyi mu ngoongo hweeyalise eyomu ngoongo.

¹²Huchia ohuwuuna ohusiingira mani hulambuule emisabbiibbu hubone ni kyachaaka ohuhulaho, nikali mbwe ebimuli nibiri ohubaambuha haandi emisaala ky'obutuunda nikyaama. Eyo niyo yi njia ohuhubeera obudya bwaange bwoosi.

¹³Onyala waawunyiirisaho esing'aari sya manduraki, haandi ebyaamo bilai biri hu mulyaango. Omuheerwa, ese ndahubiihira esangaalo ehale neende eyaaha.