Read saamia Yisaaya 1 Bible Online

Yisaaya 1 - saamia bible

Yisaaya 1

¹Ohuboneherwa hwa Yisaaya omwaana w'Amosi, hu yaboneramo ebiindu bidiira hu Buyudaaya neende Yerusalemu mu ndaalo cha Wusia, Ahasi, Yonataamu neende Hesekia, abatuki ba Buyudaaya.

²Wulira, ewe ekulu, haandi ewe esyaalo tekeeresa; olwohuba Omwaami niye olomaloome: Abaana bandanyoola ndahusa, nae baanjemeere.

³Eng'oombe yimanyire omweeneyo, haandi esuhiri yamanya abuundu yi mwaami wayo ayiliisirangamo; nae abaandu baange Abaisiraeli haba sibaamanyire daawe, abaandu baange beene, haba sibabaasa daawe.

⁴Chihwakaanire, ewe esyaalo syonooni, abaandu beechuuleho ebyonoono, abeechuhulu b'abonooni, abaana bahola ebidoondobanu! Bamalire ohutula hu Omwaami, bamalire ohulekeeresa Omwoolerefu wa Yisiraeli, bamalire ohumufudatira elalira.

⁵Lwasiina mwemeeda ohujeema, hu mudoong'e nimusaandisibwa? Omutwe kwoosi kwichuule ebikoonjo, haandi omwooyo kwoosi kuweeremo amaani.

⁶Ohutula hu mutwe ohwoolera elalira hu makulu, abulao abuundu alamu, nae ohutusaho ebinyubuluuhe neende ebifwiimba byoong'ene neende ebikoonjo bidaacha; basisiiri ohubifwiinya, noomba ohubiboya, noomba ohubibahaho amalesi.

⁷Esyaalo syeeng'we syoosi sidoong'ere esihaya, ebiko byeeng'we byoosi bisaambirwe neende omuliro mani byasihirira; abeene nimubona abateende baamba esyaalo syeeng'we; esyaalo syeeng'we sidoong'ere esihaya, koti esiwaambirwe neende abateende.

⁸Mani Siyooni syoong'ene nisyo esidoong'ere koti esikaali mu ndalo y'emisabbiibbu, koti esiyuumba sibaliindiramo omukuunda kw'amaondo, koti esiko si bebodoohanie ohuwaamba.

⁹Nae Omwaami w'Obunyala aba n'atatuleheraho abaandu abadiidi ohuwonaho, hwahabeere koti Sodomu, haandi hwaheeholere koti Gomora.

¹⁰Wulire emboosi ch'Omwaami, eng'we abatuki ba Sodomu! Tekeerese enjekesa ya Nasaae weefwe, eng'we abaandu ba Gomora!

¹¹Omwaami ateeba ati; Ebiyaanwa byeeng'we biingi bi muyaana bihoonya siina? Sinyihiire ebiyaanwa bisaambwa eby'amakoondi mamiiku neende amasinya ak'esolo cheeng'we enginu. Haba siindaha amabaanga k'eng'oombe esurusi, noomba ak'amakoondi madoto, noomba ak'embusi ehole.

¹²Wiina mweene owabalagira ohwichaanga mu moni waange ohuseenakiraanga sa olwaanyi lwaange?

¹³Mutemeeda ohuleeta ebiyaanwa bitaalimo amahuluundu. Sinyihiire obubbaani bu munioohesera.

¹⁴Sinyiihire elalira ebidyaalo byeeng'we eby'Omwoosi muyaaha neende eby'endaalo cheeng'we ehuluundu;

¹⁵Mani sakira, nimunasiingiseenge amahono keeng'we aakulu nimulaama esaala cheeng'we, haba siinjia hubadeebaho daawe; kata mwahalaama mutye, haba siinjia hutekeeresa; amahono keeng'we keechulaho amabaanga.

¹⁶Abeene mwesaabe, mani mulabe; mutuse ebyonoono bi muli ohuhola mu moni waange; mwaakame ohwonoona,

¹⁷mweeke ohuhola ebilai. Mubone muti muhola obuhoyera kololeenge abafwiinyirira abasyaabwe; mulwaanirireenge abaana bafwiirwe, mukayirireenge abahasi bafwiirwe.

¹⁸Omwaami aboola ati, “Bulaanu mwiiche huteesere alala; kata ebyonoono byeeng'we abyahaba ebyaahanyu koti amabaanga, bichia ohulaba bibe koti amakina k'efula; kata abyahaba nibyatalaga byahanya muno, bichia ohulaba bilafuye koti enyaange.”

¹⁹Nimunabecheenge abeetekefu haandi abawulisi, munaalicheenge ebyaamo bilai bitula mu syaalo syeeng'we.

²⁰Nae nimuhaya ohuwulira mani mwajeema, mwaheetweenge neende olugaanga; ese Omwaami, niise olomaloome.

²¹Esiko syali esyeesikwa bulaanu syeholere koti omuhasi mucheke, esiko esyali nisyeechulamo obwadyeeri. Hale syali syamenyamo abaandu baluungifu, nae bulaanu abatemo nibo abasidoong'amo.

²²Yerusalemu, efeesa yao yeholere esiindu sitalimo engaanga, efiini yao yiri koti yibasasiremo amaachi.

²³Abeemeresi bao bajeemu nibo haandi bakeendera alala neende abeebi. Buli muundu yaheera engusi haandi ang'aang'abanira sa ebiyaanwa bi bababeresa. Haba sibadeebayo hulwaanirira abaana bafwiirwe, haandi abahasi bafwiirwe nibaleeta amaliro kaabwe yi bali, haba sibabawulira.

²⁴Sakira Omwaami w'Obunyala, ow'Amaani Mweene wa Yisiraeli aboola ati: “Eee, njia ohwiisa etima lyaange hu basuku baange, mani omweene njia ohwetuunga hu basuku baange.”

²⁵Njia ohuhwechuuhira mani hunyuhuule koti lubanyuhulaanga ebyuuma mani hutusemo obuchaafu bwao bwoosi.

²⁶Mani njia ohuhukalusira abakayi abali koti abataangira, haandi abakeraki bao bachia ohuba koti abataangira. Ebyo nibiweere, bachia ohuhulaanga bati, esiko siluungifu, esiko syeesikwa.

²⁷Obwadyeeri nibwo obuchia ohununula Siyooni, haandi obuluungifu nibwo obuchia ohununula abaandu baamwo abeyolobya.

²⁸Nae abajeemu neende abonooni bachia ohusihirira elalira, neende abo abebwaaba Omwaami, bachia ohumalwao.

²⁹Mani esoni chichia ohubadiira hulw'emisaala kimweenamiraanga; neende hulw'endalo chimwayanaanga eyiri emisaambwa.

³⁰Olwohuba muchia ohuhooha koti emisaala ki amasaafu kachio kahoohaanga, haandi koti endalo choomereramo amaachi.

³¹Ab'amaani bachia ohuba koti obunyaasi bwoomu, haandi ebyonoono bi bahola bibe koti enjeserye ch'omuliro, mani boombi babasaambire alala, mani yahabuleo omuundu yeesi owahanyale ohukayira ohusihirisibwa hwaabwe.