Read saamia Yisaaya 13 Bible Online

Yisaaya 13 - saamia bible

Yisaaya 13

¹Yino niyo emboosi yidiira hu Bbabbilooni, yi Yisaaya omwaana wa Amosi yanyoola ohutula eyiri Nasaae.

²Musiingisire ebbeendera y'ohulwaana hu sigulu sibulaho obunyaasi. Mulaange abasikaari; mubawuubire amahono mani beengire mu siko sirimo abaandu bahunuufu.

³Ese Omwaami niise olagiire abasikaari baange ba ndooleremo, haandi abasaacha b'amaani haandi bandeehoyeramo, mbalagiire ohusaandya abo abandiisa etima.

⁴Wulire esiyoka siri hu ngulu esiyoka siri koti esy'abaandu baangi muno! Wulire, esiyoka sy'obwaami, esiyoka sy'ebyaalo byebuusire alala! Omwaami w'Obunyala ali ohubuusa alala abalwaani b'amaye ohulwaana ebiita.

⁵Batula mu byaalo byeeyale, hu njakamo y'esyaalo. Mu tima lyae, Omwaami achia ohubehoonyera, ohusihirisa esyaalo syoosi.

⁶Muhubbe embuungu, olwohuba oludaalo lw'Omwaami luli aambi; oludaalo lu ow'Obunyala bwoosi achia ohuleeteraho ohusihirisa.

⁷Mani sakira amahono ka buli muundu kahedeembule, haandi omwooyo kwa buli muundu kwahaweemo amaani.

⁸Mani abaandu boosi bahatye, haandi esasaakisi neende obuchuuni byahabadiire; bahabe mubuchuuni obuli koti obw'omuhasi olumwa esasaakisi. Bahatingalaneho nibatiire; esoni nichichuule mu moni waabwe.

⁹Bone, oludaalo lw'Omwaami luli ohwiicha, oludaalo lwaalaba, hulw'etima ehataafu neende ely'obwaalaba, mani luchia ohusihirisa ababi lubamale hu syaalo.

¹⁰Buli eng'ining'ini cho muukulu neende ebidiiyiha byacho byahalehere ao ohwaaduha; elyuuba nilisiingira, lyosi esiirima syahalidiire haandi omwoosi haba sikwahaaduhireho elalira.

¹¹Omwaami aboola ati, “Njia ohuleeta amasira hu syaalo hulw'ebyonoono byasyo, haandi njia ohusaandya abaandu hulw'ebyonoono byaabwe. Njia ohwaakamya ohwesuunga hw'abaandu beehuduumbasa, haandi njia ohuloongoyasa buli muundu owehuduumbasa mani yatiisa-tiisa abaasye.

¹²Ndahahole abaandu babe ab'engaanga muno ohuhira esaabbu, haandi abaandu bahabe ab'engaanga muno ohuhira esaabbu ndai ya Ofiri[1].”

¹³Mani sakira njia ohukera ekulu liteengerehe, haandi esyaalo sidengaane situle mu bwiihalo bwasyo, hu ludaalo lu ese Omwaami w'Obunyala ndaheekesereho obwaalaba bwaange neende etima lyaange ehataafu.

¹⁴Oludaalo olwo nilwahoole, Ababbabbilooni baheeruhe koti emboongo yiiruha abayiimi, haandi koti amakoondi keeruha nikasalaanire nikabula omwaayi, buli muundu yahakobole eyiri abaandu bae beene, haandi buli muundu yaheeruhe n'akobola mu syaalo syae syeene.

¹⁵Buli muundu yibahakweeho, balimufumita, haandi buli muundu yibahadiire, bahamwiitireo neende olugaanga.

¹⁶Abaana baabwe bayere bahasaamulwe aasi basaasakulwe mu bituundu-tuundu abeene nibababona. Enyuumba chaabwe chahayaaywemo ebiindu, haandi abahasi baabwe bahadiirwe mani baabakwiichaangaho neende amaani.

¹⁷Omwaami aboola ati, “Bone, ndi ohusaangulusa Abamedia babaseete, Abamedia batadeeba hu feesa, haandi kata basaangaalira esaabbu.

¹⁸Obuyiingo bwaabwe buchia ohwiita abaana beeng'we baraaga; haba kata sibachia hukwiira esisa abaana badoto daawe; kata ohuleheremo abaana bayere.

¹⁹Mani Bbabbilooni, esihira obwaami bwoosi oluyaali, esilai haandi si Abakalidaaya beehoyeramo, siriba koti Sodomu neende Gomora, Nasaae nasisihiriise.

²⁰Bbabbilooni haandi sisyahakobolwemo ohumenywamo abaandu daawe kata sa ohubaamo abaandu endaalo choosi. Yibulao Omuaraabbu owahoombahemo eyeema lyae, yibulao abaayi abahayiireyo ebyaayo byaabwe daawe.

²¹Nae ebisolo biteende nibyo ebyahamenyeengemo, haandi enyuumba chamwo chaheechulemo ebiyu by'amahirihiihi sa; amawudo kahamenyemo, haandi emisaambwa kyahahinireengemo emidiikolo chakyo.

²²Eng'u chahawuumire mu minaara kyaabwe, neende amabbwe mu madooho kaabwe kohu sangaaliraangamo. Esiha sy'enjakamo ya Bbabbilooni siri aambi ohwoola, haandi endaalo chaasyo chiri aambi ohuwaayo.”