Read saamia Yisaaya 14 Bible Online

Yisaaya 14 - saamia bible

Yisaaya 14

¹Omwaami haandi yahakwiire Yakobbo esisa, haandi yahadoole Abaisiraeli babe abaandu bae, haandi yahabakoboseyo bamenye mu syaalo syaabwe. Abateende baheeche bamenye alala neende abeechuhulu ba Yakobbo, mani baboomiirireho elalira.

²Abaandu b'ebyaalo biindi bachia ohuhalaabaniraanga Abaisiraeli mu syaalo syaabwe si Omwaami yababeresa; haandi Abaisiraeli bachia ohubabukula babe abahalaabani bawaambe baabwe, abasaacha neende abahasi sidubaanie. Abaisiraeli bahawaambe abo abali nibabawaamba, haandi bahatuke abo abali nibabeehalaho baabafwiinyirira.

³Ebiha byahoole Omwaami abawuluuse mubuchuuni neende mu husaanda neende muhudidiihana neende emirimo chibabayikaanga ohuhola.

⁴Mwahaduulireenge omutuki wa Bbabbilooni nimuboola muti: “Omutuki mwaalaba akwiire! Obwaalaba bwae bulaanu bwakaame!

⁵Omwaami afunaake endawusi y'abatuki babi, yaakaamye obunyala bw'abatuka bubi,

⁶abo abasandyaanga abaandu neende obwaalaba abatakamaanga ohubahuya, abo abatukaanga ebyaalo neende etima mani bahaya ohutalwaho daawe.

⁷Esyaalo syoosi-syoosi bulaanu siwuluuhire haandi siri mu muleembe; mani buli muundu atunduuhe neende ohweemba hulw'esangaalo.”

⁸Emisaala migasya chisangaalire ohukwa ohwo, emituumba kya Lebbanooni cheehoya nichiboola chiti, “Ohutula nookwa aasi, abulao omuundu otutuma daawe.”

⁹Ab'emakoombe aasi, beetekehe ohuhubukaanira niwiicha, basiingisa abo boosi-boosi abaliyo ohwiicha ohuhuheesa; abo boosi abali abatuki b'esyaalo; basingiire ohutula hu bisaala byaabwe by'obutuki abo boosi abali abatuki b'esyaalo.

¹⁰Boosi-boosi bachia ohulomaloma nibaboola bati: “Ewe wesi weeholere omukata koti efwe! Okatayaliire elalira koti efwe!”

¹¹Oluyaali lwao neende enyembo chi bahwemberaanga hu buhana byoosi biisirwe aasi emakoombe; weyaliise hu nyeende, haandi enyeende nicho chi webwiihire.

¹² “Ewe Eng'ining'ini y'Echuli, Esulwe yomu Mabwiibwi! Ewe hane wanuuhe ohutula aakulu waakwa aasi. Ewe owasaandyaanga ebyaalo biindi, otemerwe waakwa aasi hu loba.

¹³ Mu mwooyo kwao waboolaanga oti, ‘Njia ohuniina aakulu muukulu; mbe aakulu w'eng'ining'ini cha Nasaae njia ohuta esisaala syaange sy'obutuki aakulu; haandi njia ohwiihala hu lugulu lw'ohuhung'aaniraho oluli emukulu bweene.’

¹⁴Waboola oti ochia ohuniina obe aakulu w'amaleesi, mani omweene wehole koti oyo oli Aakulu Muno.”

¹⁵Nae wiisirwe aasi Emakoombe bweene, aasi mu lwaalo lw'Eliina.

¹⁶Abo abahubona bahutingaale mani beteebe bati: “Mani wuno niye omuundu owakeraanga esyaalo nisiteengereha, haandi owadenganianga obwaami?”

¹⁷Wuno niye owakeraanga esyaalo nisiba esiparara, haandi owawambaanga ebiko; otaleehulaanga ababoye bae, naatabaleha baakobolaanga mu ngo waabwe daawe?

¹⁸Abatuki b'esyaalo boosi bahasiihibwe mu luyaali, buli otulayo mu ng'ani yae;

¹⁹nae ewe wahasukunwe erwaanyi, eyale neende eng'ani yao, koti esituluucho. Bahahubwiiheho emilaambo ky'abasikaari babetera mu biita, baabafumita neende engaanga, babasukune mu liina ly'amakina, nooba omulaambo ku baseenakira mu makulu.

²⁰Olwohuba wasihirisa esyaalo syao, haandi weeta abaandu bao, haba siwahasiihwe koti abatuki basyo. “Lehe olwibulwo lw'abonooni luhaye ohwiichuliswa!

²¹Mutekehere abaana bae ohwiitwa hulw'ebibi bya bakuuka yaabwe, bahaye ohusiingira mani batuka esyaalo, haandi beechusa esyaalo syoosi neende ebiko byaabwe.”

²²Omwaami w'Obunyala aboola ati, “Njia ohuseeta Bbabbilooni mani sireetere ohusihirira, eliita lyaasyo lihaye ohudoong'ao, yibuleo omwaana yeesi owonao, kata omwiichuhulu. Ese Omwaami nilwo lu mboolere.

²³Njia ohuhola Bbabbilooni sibe esyaalo syadebeeramo amaachi, mani amahirihiihi kachia ohumenyamo, haandi njia ohusyeyera neende olweyo lw'ohusihirira. Ese Omwaami w'Obunyala nilwo lu mboolere.”

²⁴ Omwaami w'Obunyala yechubire n'aboola ati: “Koti lu tekeehe, nilwo lu sichia ohuba, haandi koti lu heengereo, nilwo lu sinaholehane.

²⁵Njia ohwiitira Abasiria mu syaalo syaange, haandi mbaseenakire mu makulu hu ngulu chaange. Olwo ekoombo libababoyaho lyahabatuleho, haandi omugugu musito ku babadwiiha kuchia ohutula hu mabeka keeng'we.”

²⁶Sino nisyo esichiiririrwa si tekeehe esidiira esyaalo syoosi; haandi ngoloole omuhono kwaange hu syaalo syoosi.

²⁷Omwaami w'Obunyala amalire ohuheengao, mani abulao omuundu onyala ohumukayira. Amalire ohukolola omuhono kwae, mani abulao onyala ohumwaakamya.

²⁸Mu mwaaka ku omutuki Ahasi yafwiiraho, bino byalaangwa biti:

²⁹ “Eng'we Abafilisiti, mutasangaala daawe, mweesi mutasangaala, nimuboola muti, endawusi yabahuyaanga yimalire ohufuniha, olwohuba yi njuha yibeere, yichia ohukobolao eefubi, haandi mu buyu lyao, muchia ohwalulwamo enjuha yibburuha.

³⁰Mani Omwaami niye ochia ohuliisa abaandu bae bamanani muno, haandi abali mu ngisa bahamenye mu muleembe. Nae eng'we Abafilisiti, Omwaami yahabeete neende enjala y'amaani yitiisa haandi abahabe nibawonereo, bosi bachia ohwiitwa.

³¹Muchereenjese, Eng'we abali hu biruwa; mulire, Eng'we abali mu siko; Lehe amatiichasi kabadiire, Eng'we Abafilisiti mweesi! Olwohuba omwoosi kuli ohuniooha nikutulira emukulu, elyo nilyo eye ly'abasuku beeng'we omubulamo omuundu otya yeesi.”

³²Mani bawamwaanda b'esyaalo esyo bahakobolemo batye? Bahaboole bati, “Omwaami yataao Siyooni, mani omwo nimwo mu baandu bae basaanda baheeruhire.”