Read saamia Yisaaya 15 Bible Online

Yisaaya 15 - saamia bible

Yisaaya 15

¹Omulaanga kuno kudiira hu Moabbu. Olwohuba esiko Ari sisihiriiswe mu siro silala Moabbu siwereyo; olwohuba esiko sya Kiiri sisihiriiswe mu siro silala, Moabbu siwereo.

²Abaandu ba Dibboni baniinire ebigulu balirire eyo amasika; Abamoabbu baayulira ebiko bya Nebbo neende Medeba. Ohweekesa engisa yaabwe, beebekereho efwiiri neende ebirefu.

³Abaandu bali hu ngira befwaalire ebigunia; aakulu hu birama by'enyuumba chaabwe, neende mu masang'aangira k'ebiko byaabwe, buli muundu alira n'ahulukusa amasika.

⁴Abaandu ba Hesibboni neende aba Eleyale bahubba embuungu, mani amakono k'enduulu kaabwe kawuliirihana ohwoolera elalira mu Yahasi; mani sakira kata abasikaari ba Moabbu balira nibahuumula; eholo yiboobba.

⁵Ese njuunirwa Moabbu; abaandu basyo beeruhira Soyaari, neende Egilaati Selisiya. Abaandi baniinire esiniino sya Luhiti baniina nibalira. Abaandi badiirire engira ya Horonaimu bahubba embuungu olwohuba bachia ohusihirira.

⁶Omwaalo kwa Nimurimu kuhamire; obunyaasi buli hu ndulo wakwo buhoohere, haba sibunyala huloha haandi, sibulao esiindu si nyala ohukumeraho daawe.

⁷Mani sakira, ebiindu biingi bi banyoola neende ebyo bi bali nibabiiha bahabikiinge nibeeruha ohubiwonia nibabitira mu Hooho lya Wiloowi.

⁸Olwohuba ohulira huwuliirihaniire buli abuundu ohwebodoohania esyaalo sya Moabbu; embuungu choolere mu Egilaimu, embuungu choolere mu Beerelimu.

⁹Olwohuba amaachi ka Dibboni keechulamo amabaanga; nae haandi Omwaami yahaleete amasira kahiraho ako hu baandu b'ebweene eyo. Edalang'i chahalye Abamoabbu bahabe nibawonereo, abo abahabe nibadoong'ereo mu syaalo sya Moabbu.