Read saamia Yisaaya 17 Bible Online

Yisaaya 17 - saamia bible

Yisaaya 17

¹Bino nibyo ebiindu bilaangirirwa ebidiira hu Damasiko. Bone, Damasiko sichia ohwaakama ohuba esiko, sichia ohuba esituuli sy'amagiingiri komu ekuunda.

²Ebiko bya Siria bichia ohutulirwamo elalira; binabechaanga olwaayiro lw'ebisolo, yi binawuluuhiraanga abulao obitiisa.

³Efuraimu haba sisinabechaanga neende esiko sisite daawe, haandi obutuki buchia ohutusibwa mu Damasiko; mani Abasiria abahaoneo badiirwe esoni koti abomu Yisiraeli, Omwaami w'Obunyala niye oboolere.

⁴Mani oludaalo olwo nilwahoole oluyaali lwa Yakobbo lwahaduuduye, mani ebiha byohuhomera, nae yahang'aye sa.

⁵Yisiraeli syahabe koti endalo yibabeteremo engaano yi bakesere. Syahabe koti omukuunda kwomu ehooho lyomu Refaimu kubamalire ohudoolamo ebyaamo.

⁶Nae mu Yisiraeli mwahadoong'emo abaandu badiidi muno, bahabe koti omuseituuni kubamalire ohunokaho ebyaamo okudoong'ereho ebyaamo bibiri oba bidatu aakulu wakwo bweene, ebyaamo bine oba bitaanu hu masaga k'omusaala kwaama bulai muno. Omwaami Nasaae wa Yisiraeli niye oboolere.

⁷Ebiha ebyo nibyahoole, abaandu bahate omwooyo hu Muloongi waabwe, mani bakaluuhane baachia eyiri Omwoolerefu wa Yisiraeli.

⁸Bahaakame ohweesikaanga alutaari chibeeholera neende amahono kaabwe abeene, haandi haba sibaheesikeenge ebiindu biindi bi bahola sa abeene, oba ebiloongaloongwe bya nasaae olaangwa, Aserimu oba alutaari chaabwe chibanioheseraangaho obubbaani.

⁹Ebiha ebyo nibyahoole, ebiko byaabwe by'amaani byahabulemo abaandu mani byahadoong'e sa nibyasihirira koti ebiko bi Abahiifi neende Abaamoori beeruhamo koti lu bali nibeeruha Abaisiraeli, mani byadoong'a ebihaya nimubulamo abaandu.

¹⁰Olwohuba ewe Yisiraeli wibiriire Nasaae omuwonia wao, haandi siwiichuliiseho Olwaanda oluli obwiiruhiro bwao. Mani sakira, otaaka emisaala milai mani chaakera wenamira banasaae bateende.

¹¹Nae kata achahahulirao hu ludaalo lu mwachitaakiraho, haandi achahamulihirao hu ludaalo lu mwachitaakiraho; sibulao esyaamo simwahafuneho ohutusaho ohweyendeherera neende amasira kataona byoong'ene.

¹²Aaa, wulira ohuwoola hw'abaandu baangi, bawoola koti enyaanja yiyire. Aaa, wulira ohuworootana hw'ebyaalo, biworootana koti ohuworootana hw'efiinda ch'amaani!

¹³Ebyaalo biicha nibiwoola koti ohuwoola hw'efiinda ch'amaachi k'amaani, nae Nasaae yahabyakamye, mani byaheeruhe byakotakotanao, byahabe koti omuhuchi ku muyaka kuwuuchira hu lugulu haandi koti olufu lw'esiifuusye sy'amaani.

¹⁴Mu biha by'engoloobe, bone, ohutya hulibaao! Nae obwiire nibusisiiri ohuhya, hwahabe nihuweereo! Okwo nikwo okwahabe omukabo kw'abo abatunyaka, haandi kwahabe omusaara kw'abo abatwiibaho ebiindu byeefwe.