Read saamia Yisaaya 2 Bible Online

Yisaaya 2 - saamia bible

Yisaaya 2

¹Chino nicho emboosi chi Yisaaya omwaana wa Amosi yanyoola ohutula eyiri Nasaae echidiira hu Buyudaaya neende Yerusalemu.

²Mu ndaalo chiichayo echo olugulu lu beenamiraho Omwaami lwahabe olugulu luhira mu ngulu choosi obuhunuufu, mani lwaaba aakulu w'ebigulu biindi byoosi; mani ebyaalo byoosi byechaanga nibyebuusira yi luli,

³haandi abaandu baheeyiheenge nibeecha nibaboola bati: “Mwiiche, lehe huchie huniine hu lugulu lw'Omwaami, eyiri enyuumba yohwiinamiraangamo Nasaae eya Nasaae wa Yakobbo; hunyale ohweekaanga ebiindu byaadaha huhole haandi hukeendereenge mu ngira chae.” Olwohuba amalako k'Omwaami kachia ohutulaanga mu Siyooni, neende emboosi y'Omwaami yichia ohutulaanga mu Yerusalemu.

⁴Omwaami achia ohuheengera ebyaalo emisaango, haandi achia ohukaya obusoolo akatikaati w'abaandu. Engaanga chi babeere nibehoonyeraanga ohwiitanira, bachia ohuchiitaanya chibe embako chohulimira emikuunda, haandi amafumo kaabwe bachia ohukaholaanga kabe engeso chikesa eekesa. Mani sibulao esyaalo syahadiira ebilwaaniso ohuseeta esyaalo siindi daawe, haandi haba siyahabeeo ohweeka eby'amaye daawe.

⁵Eee, mani eng'we abeechuhulu ba Yakobbo mwiiche, lehe hukeendere mu bulafu bw'Omwaami.

⁶Ewe Nasaae, webwaabire abaandu bao, abeechuhulu ba Yakobbo, olwohuba esyaalo syaabwe basiichusamo eby'emisaambwa bitula ebukwe neende eby'obulakusi biri koti eby'Abafilisiti, haandi baloondekana neende esaambo ch'abateende.

⁷Esyaalo syaabwe syeechulamo efeesa neende esaabbu, haandi eby'obuyiinda byaabwe bibulaho enjakamo. Esyaalo syaabwe siichulemo efaraasi, haandi ebigaari byaabwe bibulaho enjakamo.

⁸Esyaalo syaabwe syeechulamo ebiloongaloongwe bya banasaae; haandi beenamira ebiindu bi beene baloonga, ebyo bi baloonga neende amahono kaabwe sa.

⁹Mani omuundu achia ohuloongoyaswa, haandi abaandi bachia ohwiiswa aasi, Omwaami haba saachia hubaleheramo kata nabudiidi!

¹⁰Mwiiruhe mwiingire mu ng'uungu chomu makina, mani mweekise mu lufu nimwiiruha Omwaami otiisa, nimwiiruha oluyaali lwae lw'amaani.

¹¹Oludaalo luchia ohwoola, lu ohwehudumba hw'abaandu huchia ohumalwao, haandi esuunga y'abaandu yichia ohuloongoyaswa; mani Omwaami yeeng'ene niye owahakinisibwe hu ludaalo olwo.

¹²Olwohuba Omwaami w'Obunyala ali neende oludaalo lu yahaloongoyasireho abo boosi abeehuduumbasa neende ab'esuunga, neende buli muundu yeesi oweniinia neende oyo owehuduumbasa.

¹³Omwaami achia ohusihirisa emisaala mileeyi choosi echa Lebbanooni, neende emituumba choosi echa Bbasani.

¹⁴Omwaami achia ohukwalaasa engulu ndeeyi choosi, neende ebigulu byoosi;

¹⁵achia ohukwalaasi buli munaara muleeyi, neende buli sida syomiifu esyasita olukaka.

¹⁶Omwaami achia ohwiibisa mu nyaanja emeeri cha Tarusiisi choosi, neende buli siindu sisangaasa ohubona syoosi.

¹⁷Ohwehuduumbasa hw'abaandu huchia ohuloongoyaswa, neende ohweniinia hw'abaandu huchia ohwiiswa aasi; mani hu ludaalo olwo, Omwaami yeeng'ene niye ochia ohukinisibwa.

¹⁸Mani ebiloongaloongwe bibeenamira bichia ohuwerao elalira.

¹⁹Mani abaandu bachia ohwiingira mu ng'uungu chomu makina neende mu meena kabayaba mu loba, ohweekisa Omwaami ow'amatiichasi, haandi ohweekisa oluyaali lw'amaani kae, niyahekisuleyo ohutiisa neende ohuteengya esyaalo.

²⁰Hu ludaalo olwo, abaandu bahasukune eyale ebiloongaloongwe bi beenamiraanga ebiloongaloongwe byaabwe by'efeesa neende eby'esaabbu, bi beene beeholera ohwiinamira, bahabirehere eefuho neende embudombuudo.

²¹Omwaami niyaheeche ohuteengya esyaalo, abaandu bachia ohwekisaanga mu meena, mu ng'uungu chiri mu ngulu ch'enyanda ohuteemaho ohweyonia etima lyae haandi neende ohweekisa ohutula hu bunyala bwae neende oluyaali lwae.

²²Mutesikaanga omuundu owahafwe sa, siindu siina syeene esy'engaanga syaali nasyo?