Read saamia Yisaaya 21 Bible Online

Yisaaya 21 - saamia bible

Yisaaya 21

¹Yino niyo emboosi yidiira hu siparara sisibiraane neende enyaanja. Koti esiifuusye situlira mu siparara mani syeeya mu Negebbu, olwo nilwo lu masira kahatulire mu syaalo sy'amatichasi esiindi.

²Mbweene mu ohuboneherwa ebidinyu ebyahakweeo; omuliichaki n'alichaka haandi omusihirisi n'asihirisa. Ewe eye lya Elamu, siingira oseete, neende ewe eye lya Media, weesite webodoohanie; ebidinyu byoosi bi Bbabbilooni syaleeta Nasaae achia ohubyaakamya.

³Obuchuuni buunjita; obuchuuni bumaambire, buli koti engasi ch'omuhasi odaha ohwiibula; nguunaame aasi endi haye ohubuwulira, nae mbungaalire kata emoni chaange haba sichibona daawe.

⁴Olumbuuchu ludiirire, oluteengo lungwiiremo; esiirima si mbeere nindekoomba siinduliiremo amatiichasi.

⁵Bali ohutekeha esidyaalo, baalire aasi emikeeka, beehaale baalya, haandi baang'wa. Eng'we abahuluundu b'amaye, musiingire, mubahe engabo cheeng'we amafuta!

⁶Olwohuba Omwaami yamboolere ati: “Chia, oteeo omuliindi, alaangirire ebiindu byaabona.

⁷Naabona ebidiiyiha by'abaandu babiri-babiri abeerusa efaraasi, abeerusa esuhiri, neende abeerusa engamia, leha yehaliirise bulai, yehaliirise bulai bweene.”

⁸Mani oyo owabona yahuumulira mu kono ly'aakulu ati: “Ewe Omwaami, ese niinda ano esideete syoosi, haandi njihaale hu mulimo kwaange, esiro syoosi.

⁹Nae bonaho, mbao beecha abeerusi b'efaraasi babiri-babiri!” Nae omuliindi yakobolamo ati, “Bbabbilooni sikwiire, sikwiire; haandi ebiloongaloongwe bya banasaae basyo bidonyoohe-donyoohe, bikwiire aasi hu loba.”

¹⁰Eng'we abaandu baange Abaisiraeli, babeere babahunyeenya koti engaano yiri mu lwaanyi. Nae bulaanu mbao mbaleetera emboosi ndai ohutula eyiri Omwaami w'Obunyala, Nasaae wa Yisiraeli, ebyo bi mbuliire nibyo bi mbaboolera.

¹¹Yino niyo emboosi yidiira hu Duma. Yiriwo oli ohunaanga naali Seyiri, “Omuliindi, esiro sibeere sitye? Omuliindi esiro sibeere sitye?”

¹²Nae omuliindi n'akobolamo n'aboola ati: “Obwiire buhya, haandi bweera; nikali mbwe odaha ohundeeba haandi, teeba sa; kobola sa haandi.”

¹³Yino niyo emboosi yidiira hu Buwaraabbu. Eng'we ebidiiyiha bya bawalukeenda by'Abadedani, abali mu biparara bya Araabbia.

¹⁴Eng'we abamenya mu Tema, abo abeeruhira yi muli obuluwo nibubaluma, mubabereseenge esyohung'wa, haandi abalumwa enjala mubabecheenge esyohulya.

¹⁵Olwohuba baba nibeeruuhe engaanga, beeruuhe engaanga chimalire ohusowolwayo, beeruhe obuyiingo bumalire ohubachoomiaho, haandi beeruha ebiita biri aambi ohukwaao.

¹⁶Omwaami yeemao yamboolera ati, “Mu mwaaka mulala kwoong'ene, obuhunuufu bw'enono cha Abakedaari lwahasihiriswe.

¹⁷Abalasi b'obusaale bahiramo amaani haandi abachweenufu Bakedari nibo, mani abahaoneo bahabe abadiidi muno. Ese Omwaami, Nasaae wa Yisiraeli, nilwo lu mboolere.”