Read saamia Yisaaya 28 Bible Online

Yisaaya 28 - saamia bible

Yisaaya 28

¹Chibaakaanire eng'we abaandu beehuduumbasa haandi abameesi ab'Obwaami bwa Yisiraeli, oluyaali lwaabwe lufwiiririra. Luli koti ekofia y'obutuki y'esimuli sihoohere, esiri hu mitwe ky'abeemeresi babwo abadeeba hu hung'wa amalwa koong'ene.

²Bone, Omwaami ali neende oyo ow'obunyala haandi ow'amaani, owetekeehe ohubaseeta. Oyo ali koti omuyaka kulimo amakina k'efula, haandi omuyaka kusihirisa, ali koti amaachi k'amaani kahulukusa, achia ohukwa aasi hu syaalo neende obwaalaba buungi.

³Mani ohwehuduumbasa hw'abeemeresi bameesi hwahaseenakirwe aasi mu makulu;

⁴oluyaali lufwiiririra lw'abeemeresi bameesi abo lwahaweeo mani lwaaba koti ebyaamo by'emisaala mituli bitaangira ohweenga esiminyu nisitoola; abaandu nibabibona, banoka baabilya bwaangu muno hu byaheengera sa biti.

⁵Ebiha byahoole Omwaami w'Obunyala lu yahabe ekofia y'obutuki bw'oluyaali, haandi esilai muno, esy'abaandu bae bahadoong'eo.

⁶Haandi yahaberese omwooyo kw'obwadyeeri eyiri abo abakayi b'emisaango, haandi yahaberese amaani abasikaari abaliinda ebiruwa by'esiko ohutaseetwa.

⁷Bano bosi amalwa kabanyaasa badandaamira nibang'weere amalwa maangi nibatanyala ohumanya ohuboneherwa hu Nasaae yabaleeteraanga; abalaamisi neende abanabbi, amalwa kabanyaasa, amalwa kabadoondobaania, bakeenda nibadandaamira olw'obumeesi; abanabbi badoondobana mani bahaya ohumanya, mani bahaya ohuheenga bulai emisaango kibabaleteere.

⁸Emeesa chiri yi beehaale choosi cheechulaho amasasi, abulao abuundu alai adoong'ere daawe.

⁹Bachia ohwekanyiirisa nibaboola bati, “Oyo yekesa wiina, haandi wiina mweene yanakerakira? Fwaana abaana bayere abasisirwe ohunuuna, abo abatusirwe hu mbeere.

¹⁰Olwohuba yeekesa esilagiro n'ameeda hu silagiro, olunyiriri n'ameeda hu lunyiriri, ano niyeekesayo hadiidi, haandi era niyeekesayo hadiidi.”

¹¹Nimutadaha ohuwulira bi mboola, Omwaami yahehoonyere abateende, abalomaloma olulimi luundi ohubeekesa esyo syaaba naadaha.

¹²Yababoolera ati, “Huno nihwo ohuwuluuha; abajoong'ere mubawuluuse; haandi huno nihwo ohuba bulai”; nae nibahaya ohuwulira.

¹³Mani sakira emboosi y'Omwaami yichia ohubeekesa esilagiro niyimeeda hu silagiro, olunyiriri niyimeeda hu lunyiriri, ano niyeekesao hadiidi-hadiidi, haandi era niyeekesayo hadiidi-hadiidi; bachia ohudandaamira bakwiire emikoongo. Bachia ohunyaaliha, batekwe mani bayaambisye.

¹⁴Mani sakira wulire emboosi y'Omwaami, eng'we abalekeeresi, abatuka abaandu abomu Yerusalemu!

¹⁵Olwohuba mweniinia nimuboola muti, “Hwahola endagaano neende oluumbe, mani nimufukirisania neende emakoombe. Mwomiisa muti amasira nikaheeche eng'we haba sikahabakweeho; olwohuba muholere eby'obubacha ohuba obwiiruhiro bweeng'we, neende obutali obwadyeeri ohuba obweyikamo bweeng'we.”

¹⁶Sakira Omwaami Nasaae aboola ati, “Bone, ndi ohuyabira mu Siyooni esiiro y'omuse, esiiro yimalire ohuteemwa, esiiro y'omuse kw'engaanga y'aakulu, esiiro yomiisirwe aasi: ‘Oyo ofukiirira haba siyahabe obbibbiirihana daawe.’

¹⁷Mani njia ohuhola obwadyeeri ohuba omukoye kukera omusiingi, haandi obuluungifu nibwo obuchia ohuba ebbirigi yipiima; amakina k'efula kaheeyeo kaamalao obubacha bubeesika obwo, nae amaachi k'omuhula kahasihirise abuundu yi beekisaanga.”

¹⁸Endagaano yeeng'we yi mwahola neende oluumbe yahahalakwe, haandi endagaano yeeng'we neende amakoombe yahaakame. Amasira k'amaani nikahabite hu syaalo kahabalehe nikabafwiinyiriire aasi.

¹⁹Buli siha si masira k'amaani kahabiteenge hu syaalo, kahabafwiinyirireenge, buli lu buhya, kahabafwiinyirire, sibe esideete kata sibe esiro; buli mboosi yitula eyiri Nasaae yahabe eyitiisa sa.

²⁰Mwahabe koti omuundu weyaliise hu sitaanda siimbikiti, syatanyala ohwekololeraho, haandi eby'ohwebwiiha byasyo nibiri ebiimbikiti ebitanyala ohumubwiiha omubiri kwoosi.

²¹Olwohuba Omwaami yahasiingire yalwaana koti lu yalwaana hu Lugulu lwa Perasiimu. Yahanyoolere, koti lu yanyoolerera mu hooho Gibbeoni, mani ahole esiindu syaadaha ohuhola esiholwa syae siwukisa, haandi ohuhola omulimo kwae kw'amayia.

²²Bulaanu mutacheheerera daawe, ataali ao, eminyororo kibaboya kichia ohubang'aada abeene; olwohuba mbuliire koti Omwaami Nasaae w'Obunyala amaliriire ohusihirisa esyaalo syoosi.

²³Muteke amatwi, muwulire ekono lyaange; tekeerese, muwulire bi mboola.

²⁴Omulimi n'alima endalo yae niyeetekehera ohutaaka emere, yemeedaanga ohulima endalo eyo naloondehania sa olubeerera?

²⁵Naaba n'amalire ohusungula eloba, ataakamo emwo yoosi yaaba naadaha, koti amaido, amaraagwe. Ataakamo engaano n'ayita mu nyiriri, amabere masuungu naakataaka abuundu wako, mani hu lwaaho lwae, ataakaho ebirime biindi?

²⁶Omulimi amanyire ohuhola omulimo kwae; olwohuba Nasaae wae amweekesa.

²⁷Amaraagwe haba sibakahonjeraanga olusaala lusito, nae amaraagwe bakahoonjeraanga olusaala lwaangu olutanyala ohukanyoonyobola.

²⁸Kata engaano y'emigaati haba sibayinyoonyobolaanga daawe, nae bayihoonja nibehaliirisa bulai, emwo yidoong'e niyiri abweene.

²⁹Kano makesi kosi katula eyiri Omwaami w'Obunyala; niye otekeha eby'amakesi byoong'ene, haandi buli ludaalo amakesi kae mabiitirifu.