Read saamia Yisaaya 29 Bible Online

Yisaaya 29 - saamia bible

Yisaaya 29

¹Chihwakaanire ewe Arieli, Arieli, esiko si Daudi yoombahamo eyeema lyae! Meeda emyaaka hu myaaka; haandi lehe ebidyaalo biloondehane sa.

²Nae Nasaae achia ohuleeta amasira hu Arieli, yichia ohubaao ohulira neende engisa, esiko esyo syoosi sichia ohuba koti amahuluundu ka Arieli lu keekesa, alutaari yaange yeene.

³Njia ohuba omusuku weeng'we, mani mbeebodoohanie, njia ohubaseeta neende eminaara ky'ohuliindiraho haandi njia ohuyabaho ameena k'ohwekisamo.

⁴Yerusalemu, wahabe koti esihyeeno esiteemaho ohulomaloma nisiri aasi mu loba; ekono lyasyo ly'aasi muno, ohutula eyomu lufu.

⁵Nae esidiiyiha sihoongo esy'abasuku bao syahadumuulwe syawaao koti olufu, haandi ebidiiyiha byaabwe byaalaba byahadumuuhe koti omuhuuchi. Haandi bino byahabeeo mu siha sidiidi muno.

⁶Nae Omwaami w'Obunyala yahahuwaabine niyehoonyera ohwaduluhana neende ohudengaana hw'esyaalo, neende ekono ly'aakulu neende esiifuusye neende enimi ch'omuliro kusihirisa.

⁷Mani amaye k'ebyaalo biingi ebilwaania Arieli, abo boosi abasilwaania neende abalwaania ebiko byasyo basidiisa engisa, bahaweo koti esilooto, oba koti esiboneherwa sy'esiro.

⁸Koti lu muundu olumwa enjala anyoola ebilooto naali ohulya, mani nasimuha neende enjala yae natekuute, oba koti omuundu olumwa obuluwo anyoola ebilooto naali ohung'wa mani nasimuha mu ndoolo, obuluwo nibumuli bubi, omumiro nikwoomereere, mani amaye k'ebyaalo biseeta ohulwaania Olugulu lwa Siyooni kosi kahabe katyo.

⁹Mube ao mani musiruwale, mwemeede mu moni mani mweewofuse! Mwemeese, nimusisiiri ohung'waho amalwa; daandaamire, nimusisiiri ohuhoombaho ebimeesa!

¹⁰Olwohuba Omwaami abateeremo omwooyo kuleeta endoolo nyiingi, haandi ababwiihire mu moni, eng'we abanabbi haandi ababwiihire emitwe, eng'we abalakusi.

¹¹Mani amahuluundu koosi ak'embonehera yino, eng'we kabeeholeere koti emboosi ch'esitabo sibaboyereho esifuundiho. Mani nibasiberesa omuundu omanyire ohusoma, nibaboola bati, “Soma sino,” akobolemo ati, “Haba siinyala, olwohuba siboyerweho esifuundiho.”

¹²Nae nibaberesa esitabo esyo omuundu otaamanyire ohusoma, nibaboola bati, “Soma sino,” akobolamo ati, “Haba siimanyire ohusoma daawe.”

¹³Mani Omwaami yaboola ati, “Olwohuba abaandu bano basuda aambi naange neende eminwa kyoong'ene haandi baanjisamo oluyaali neende emboosi choong'ene, nae emyooyo kyaabwe kiri eyale naange, kata ohunyinamira hwaabwe, baloondehana sa neende emiduunga ki baandu babalagira.

¹⁴Mani sakira, bone, njia haandi ohuhola mu baandu ebiindu by'amaya, ebiindu by'amaani haandi ebiwuukisa. Mani amakesi k'abaandu bakesi baabwe, kakoteo, haandi ohuheengao hw'abachweenufu baabwe hukiswe.”

¹⁵Chibaakaanire, abo abebachirisa bati bakisire Omwaami endekeha chaabwe, abo abaholera ebiindu mu siirima, haandi abateeba bati, “Wiina otubona? Wiina otumanyire?”

¹⁶Mukaluuhanisira elalira ebiindu! Omuloongi w'endamu anyala ohukeranisibwa neende eloba li aloongera? Esiindu siloongerwe si nyala syaboolera omuloongi wasyo siti, “Haba siwanoonga”; oba esiindu syaholwa syaboolera omuholi wasyo siti, “Abulamo amakesi”?

¹⁷Koti lu nomanoma lu yiri eyiboola yiti, yidoong'ereo esiha sidiidi sa, ohwoola lu Lebbanooni syahehole omukuunda mulai, haandi omukuunda mulai kwaheehole esichaha.

¹⁸Ebiha ebyo nibyahoole, omudiimbe yahawulire emboosi chi musomerwa ohutula mu sitabo, haandi emoni ch'omuwofu oba mu siirima chahaliimbuhe mani chichaake ohubona.

¹⁹Abaandu baloonga bahemeede ohusaangaalira mu Omwaami, haandi abamanani baheehoyere mu Mwoolerefu wa Yisiraeli.

²⁰Olwohuba omusuku otiisa yahamalweo haandi omulekeeresi yaakamisibwa; haandi oyo oliinda sa ohwonoona yahasihiriswe.

²¹Nasaae yahasihirise abo ababachira abasyaabwe, abo abakayira abaholi b'emisaango ohusaandisibwa, neende abo ababoola eby'obubacha mani abaluungifu bahaya ohuheengerwa emisaango mubwadyeeri.

²²Sakira Omwaami owanunula Abburahamu aboola ebidiira hu nyuumba ya Yakobbo ati: “Ab'enyuumba ya Yakobbo haandi simwahadiiswe esoni, haandi mu moni weeng'we simwahasamuuhe oluundi.”

²³Olwohuba niyahaboneho abaana bae, obunyala bwaabwe obuli nae, bachia ohumanya eliita lyaange; bachia ohumanya Omwoolerefu Mweene wa Yakobbo, mani bachia ohwiisa oluyaali mu Nasaae wa Yisiraeli.

²⁴Abo abasirusiru bahakobolemo amakesi, haandi abo abekanyiirisa bahafukiirire babeekese.